Më shumë se 12 mijë është deri tani numri i viktimave nga tërmeti prej 7,8 shkallësh që ka goditur Turqinë dhe Sirinë në orët e para të së hënës.
Siç është parë gjatë dy ditëve të fundit, shpëtimi i njerëzve të bllokuar nën rrënoja pas një tërmeti mund të jetë një detyrë e gjatë dhe e vështirë.
Kur shpëtuesit arrijnë fillimisht në vendngjarje, ata duhet të vlerësojnë se cilat ndërtesa të shembura ka më shumë gjasa të përmbajnë të mbijetuar, shkruan BBC-ja të mërkurën.
Ata e bëjnë këtë duke kërkuar "boshllëqe" - hapësira nën trarë të mëdhenj betoni ose shkallë ku mund të gjenden njerëz.
Mundësia që një ndërtesë mund të shembet më tej gjithashtu duhet të merret në konsideratë, si dhe rreziqe të tjera si rrjedhjet e gazit, përmbytjet dhe materialet e rrezikshme si azbesti në çati.
Ndërtesat që janë shembur plotësisht janë zakonisht të fundit që kërkohen, sepse gjasat për të gjetur të mbijetuar janë shumë të pakta. Ndërsa shpëtuesit përpiqen të arrijnë të mbijetuarit, punëtorët mbështetës vëzhgojnë lëvizjet e ndërtesave dhe dëgjojnë tingujt e njerëzve.
Puna e ekipeve të shpëtimit koordinohet nga një agjenci, zakonisht Kombet e Bashkuara (OKB) dhe vendi pritës. Shpëtuesit janë të trajnuar posaçërisht dhe punojnë në çifte ose ekipe më të mëdha, ndërkohë që shpesh përfshihen edhe njerëzit lokalë.
Çfarë pajisje të shpëtimit nevojiten?
Makineritë e rënda, si gërmuesit dhe foletë hidraulike, mund të përdoren gjithashtu për të lëvizur pjesë më të mëdha të rrënojave, ndërsa pajisjet e specializuara të videos dhe zërit mund të ndihmojnë në kërkimin e atyre që janë bllokuar poshtë.
Heshtja në vend është e nevojshme ndërsa një anëtar i ekipit të shpëtimit godet tre herë dhe shpreson të dëgjojë një përgjigje. Pajisjet e imazhit termik, detektorët e dioksidit të karbonit dhe qentë snifer të trajnuar posaçërisht, janë gjithashtu ndër mjetet e përdorura për të ndihmuar në zbulimin e jetës njerëzore.
Dhe aty ku dallohet zhurma e jetës, ndonjëherë nevojitet gërmimi me duar.
Çfarë bëjnë qentë e shpëtimit?
Duke përdorur shqisën e tyre të nuhatjes, qentë e trajnuar posaçërisht mund të kapin shenja jete aty ku shpëtuesit njerëzorë nuk munden.
Qentë gjithashtu janë në gjendje të mbulojnë shpejt zona të mëdha, duke përshpejtuar procesin e kërkimit dhe shpëtimit.
Kur shpallet i përfunduar një kërkim?
Ky vendim merret midis agjencisë koordinuese të OKB-së dhe qeverisë qendrore të vendit pritës.
Përpjekjet e kërkim-shpëtimit zakonisht anulohen midis pesë dhe shtatë ditëve pas një fatkeqësie, pasi askush nuk është gjetur i gjallë për një ose dy ditë.
Megjithatë, njerëzit dihet se janë shpëtuar të gjallë përtej kësaj periudhe.
Në vitin 2010, një burrë u gjet i gjallë pas 27 ditësh të raportuar të bllokuar nën rrënoja, pas një tërmeti në Haiti.
Në vitin 2013, një grua u tërhoq nga rrënojat e një ndërtese fabrike në Bangladesh, 17 ditë pasi ajo u shemb.
© KOHA. Të gjitha të drejtat janë të rezervuara.
