Sa kohë mund të mbijetojnë njerëzit që janë të bllokuar nën rrënoja pas një tërmeti?
Deri në një javë ose më shumë, thonë ekspertët, por varet nga lëndimet e tyre, se si kanë mbetur të bllokuar dhe nga kushtet atmosferike, shkroi AP.
Ekipet e kërkimit nga e tërë bota u janë bashkuar personelit emergjent lokal në Turqi, përfshirë ai nga Kosova, si dhe në Siri, për të kërkuar për viktima nga tërmeti shkatërrues i kësaj jave që ka vrarë mijëra njerëz.
Shumica e shpëtimeve ndodh në 24 orët e para pas një katastrofe. Pas saj, gjasat për mbijetesë ulen çdo ditë që kalon, thonë ekspertët. Shumë viktima janë rëndë të lënduar ose janë të groposur nga rrëzimi i ndërtesave.
Qasja në ujë dhe ajër për të marrë frymë janë faktorë kyç, bashkë me motin. Kushtet e dimrit në Siri dhe Turqi kanë penguar përpjekjet e shpëtimit dhe temperaturat kanë rënë nën zero.
“Zakonisht, është e rrallë të gjenden të mbijetuar pas ditës së pestë dhe të shtatë, dhe shumica e ekipeve të kërkimit e shpëtimit marrin në konsideratë të ndalen deri atëherë”, ka thënë Jarone Lee, ekspert mjekësor i urgjencave dhe fatkeqësive. “Por, ka shumë histori të njerëzve që kanë mbijetuar mirë pas ditës së shtatë. Fatkeqësisht këto janë raste të rralla dhe të jashtëzakonshme”.
Njerëzit me lëndime traumatike , përfshirë lëndimet nga shtypja dhe amputimet e gjymtyrëve, përballen me dritaren më kritike të mbijetesës, ka thënë George Chiampas, specialist i mjekësisë së urgjencave.
“Nëse nuk i nxirrni jashtë brenda një ore, në atë orë të artë, ka gjasë shumë të ulët mbijetese”, tha ai.
Ata me sëmundje të tjera, shëndeti i të cilëve varet nga ilaçet, po ashtu përballen me gjasa të ulëta, shtoi ai.
Mosha, rrethanat fizike dhe mendore po ashtu janë kritike.
Pas tërmetit të vitit 2011 në Japoni dhe cunamit, një adoleshent dhe gjyshja e tij 80-vjeçare u gjetën të gjallë pas nëntë ditësh që kishin ngecur në rrënojat e shtëpisë. Një vit para këtij, një 16-vjeçare në Haiti u shpëtua nga rrënojat pas 15 ditësh.
Gjendja mendore po ashtu mund ta ndikojë mbijetesën. Njerëzit që ngecin pranë trupave, që nuk kanë kontakt me të mbijetuar të tjerë apo shpëtues, mund të heqin dorë nga shpresa, theksoi Chiampas.
“Nëse ke dikë që është gjallë, mbështeteni të njëri-tjetri për të vazhduar të luftoni”, ka thënë ai.
© KOHA. Të gjitha të drejtat janë të rezervuara.
