1 perditesime
17:37

Brenda një ore parashihet të rikthehet furnizimi me ujë në lagjen “Dardania”

Kompania Rajonale e Ujësjellësit “Prishtina” ka njoftuar se pas defektit në dy pika kyçe në lagjen Dardania të Prishtinës, uji do të lëshohet rreth orës 18:00.

“Ju njoftojmë se ekipet e operimit dhe mirëmbajtjes janë ende duke intervenuar në sanimin e defektit në dy pika kyçe, në rrugën " Garibaldi" dhe te " Santea". Kur kemi intervenime në gypa të mëdhenj, parashikimi i saktë i përfundimit të sanimit është i pamundur, sepse përgjatë procesit të punimeve, atëherë kur natyra e defektit është më e ndërlikuar, mund të dalin probleme dytësore nëntokësore”, ka njoftuar ujësjellësi.

Sipas informacioneve nga terreni, tutje thuhet se, “rikthimi i furnizimit me ujë parashihet rreth orës 18:00-18:30.

KRU “Prishtina” ka kërkuar që rubinetat e ujit të lihet hapur për pak kohë kur lëshohet uji, për shkak të punimeve në rrjet që janë bërë.

09:12

Shpërthen gypi i ujit, lagjja “Dardania” në Prishtinë mbetet pa ujë

Kompania e Ujësjellësit “Prishtina” ka njoftuar se ka shpërthyer një gyp në lagjen “Dardania” në Prishtinë.

“Në orët e hershme të mëngjesit të ditës së sotme, ka pëlcitë gypi i ujit fi 200 mm në rrugën" Garibaldi " në lagjen " Dardania" në Prishtinë. Ekipet teknike janë në vendngjarje”, thuhet në njoftim.

Ujësjellësi njofton se pa ujë të pijshëm është lagjja " Dardania" në Prishtinë ndërkaq nuk dihet ende se sa do të zgjasë sanimi.