Dyvjeçarja sulmohet nga qentë endacakë, dërgohet në QKUK
Foto: KOHA
Një dyvjeçare është sulmuar të dielën nga qentë endacakë në sheshin e Prishtinës, me ç’rast është dërguar në QKUK për trajtim mjekësor.
Familjarët e saj bënë të ditur për KOHËN se vajza me inicialet E.J., e lindur në qershor të 2020-s, ka marrë lëndime të lehta, ndërsa pas trajtimit mjekësor është liruar për në shtëpi.
KOHA ka pyetur Policinë e Kosovës dhe Qendrën Klinike e Universitare të Kosovës për rastin dhe sapo të ketë përgjigje do të përditësojë artikullin.
Rastet e tilla nuk janë të rralla në kryeqytet. KOHA ka raportuar për dhjetëra sulme të qenve ndaj kalimtarëve muajve të fundit.
