Dua Lipa do ta lansojë më herët albumin e ri “Future Nostalgia”

Dua Lipa do ta lansojë më herët albumin e ri “Future Nostalgia”

24 March 2020 09:33

Projekti i ri muzikor i Dua Lipës, “Future Nostalgia”, fillimisht ishte planifikuar të lansohet më 3 prill, por këngëtarja me prejardhje kosovare e bëri të ditur lajmin se albumin e saj të dytë do ta lansojë më herët, përmes një postimi emocional live në Instagram, transmeton Koha.

Duke folur e përlotur, Lipa tregoi se kaosi global i shkaktuar nga pandemia e koronavirusit, e ka luajtur një rol të madh në këtë ndryshim të planeve.

“Ajo që doja të flisja me ju ka të bëjë me albumin tim të ri, dhe sa herë që flas për këtë projekt emocionohem tej mase, dhe këto javët e fundit kanë qenë pak të ngarkuara për mua për shkak të situatës së fundit, e cila më ka shkaktuar pasiguri për gjithçka. Kam qenë në dyshim nëse duhet të lansojë muzikë të re në këto kohë, sepse njerëzit janë duke vuajtur. Por, shpresoj se albumi im i dytë do t’iu sjellë pak lumturi në jetët tuaja. Shpresoj t’iu bëjë të qeshur dhe të vallëzoni me njëri-tjetrin. Gjithashtu, shpresoj do t’iu bëjë të ndiheni krenarë me mua,” ka deklaruar Lipa duke qarë.

Në fillim të kësaj jave, ylli i muzikës pop e konfirmoi lajmin se kënga e saj e radhës nga albumi “Future Nostalgia”, me titull “Break My Heart”, do të lansohej këtë të premte. Por, edhe data e lansimit të kësaj kënge ka pësuar ndryshime, dhe të gjithë adhuruesit e Lipës do të kenë mundësi ta shijojnë këtë videoprojekt nga nesër.

Në videon e publikuar në Instagram, këngëtarja shumë e dashur për publikun ka rrëfyer se kënga “Boys Will Be Boys” e cila është pjesë e incizimit të ri, flet për ngacmimet seksuale ndaj grave.

“Ja çfarë lajme i keni humbur në Instalive. #BreakMyHeart + videoklipi do të lansohen KËTË TË MËRKURË më 25th mars + albumi #FutureNostalgia DO TË PUBLIKOHET TË PREMTEN E 27 marsit,” kishte shkruar Lipa në Instagram.

 

 

Ndër të tjera, bukuroshja kosovaro-britanike ka treguar se turneu i saj në Britani të Madhe dhe Evropë është shtyrë për shkak të krizës së vazhdueshme të koronavirusit, dhe datat e reja të koncerteve pjesë e këtyre turneve do të bëhen të ditura se shpejti.

Dua Lipa, po ashtu nuk ka harruar t’i këshillojë adhuruesit e saj të qëndrojnë në shtëpi gjatë kësaj pandemie globale.

© KOHA

Komentet

Shto koment

Të ngjashme