Pesë filmat më të shikuar në arkat filmike të Amerikës Veriore
Foto: AP/Associated Press
Me hapa të vegjël por të sigurt, gjithçka po i kthehet normalitetit dhe industria e filmit po mundohet t’i bëjë ballë dëmeve të shkaktuara nga pandemia. Me një numër të kinemave duke funksionuar dhe një pjesë të madhe të tyre ende të mbyllura si pasojë e koronavirusit, megjithëkëtë disa filma tashmë kanë filluar të shfaqen në ekran të madh.
Sa i përket arkave filmike të Amerikës Veriore, në pozitën e parë gjatë javës që e lamë pas është renditur filmit i animuar i studios “Disney”, “Raya and the Last Dragon”. Me një debutim të fuqishëm, ky projekt arriti që ta arkëtojë një shumë të konsiderueshme të hollash prej 8.5 milion dollarësh, kurse në javën e dytë të shfaqjes i arkëtoi edhe 5.5 milionë dollarë ekstra.
Filmi flet për Rayan e cila emërohet nga babai i saj për ta mbrojtur një sferë magjike, e cila përmban fuqi të jashtëzakonshme dhe të rëndësishme për mbijetesën e njerëzve. Por kur ajo vidhet nga disa klane tjera, Raya detyrohet ta gjej vendndodhjen e dragoit Sisu për ta shpëtuar fisin e saj por edhe mbarë njerëzimin.
Ekspertët kanë parashikuar se suksesi i filmit “Raya and the Last Dragon” do të vazhdoj edhe në javën e ardhshme.
Në vendin e dytë është pozicionuar filmi i studios “Warner Bros.”, “Tom and Jerry”. I lansuar nëpër kinema më 5 mars të këtij viti, gjatë javës që e lamë pas filmi ka arritur t’i arkëtojë edhe 4 milionë dollarë ekstra, të cilat i shtohen shumës totale të arkëtuar deri më tani e që e kap shifrën prej 28 milionë dollarëve
I treti në këtë listë renditet filmi “Chaos Walking”. Brenda një jave ky film i ka arkëtuar gjithsej 2.2 milionë dollarë nga shfaqja nëpër kinematë e Amerikës Veriore. Ky projekt, që i takon zhanrit fantastiko-shkencor dhe aksion, vjen me regji të Doug Limanit. I adaptuar nga trilogjia me të njëjtin emër, filmi bazohet në librin e parë të kësaj serie, me titull “The Knife of Never Letting Go by Ness”, dhe në rolet kryesore i sjell aktorët: Tom Holland, Daisy Ridley, Mads Mikkelsen, Demián Bichir, Cynthia Erivo, Nick Jonas dhe David Oyelowo.
Në pozitën e katër renditet filmi “Boogie”. Drama amerikane vjen me regji dhe skenar të Eddie Huangut, i cili edhe ka debutuar me këtë projekt. Nga lansimi i tij nëpër kinema më 5 mars, “Boggie” i ka arkëtuar gjithsej 2.2 milionë dollarë nga shfaqja e tij nëpër kinema. Filmi e rrëfen historinë e një fenomenit të basketbollit nga Queensi, cili mundohet ta balancoj presionin nga prindërit për të shkuar në ndonjë kolegj të mirë, me ndjekjen e ëndrrës së tij për t’u bërë yll i NBA. Deri më tani, filmi ka marrë vlerësime të përziera nga kritikët.
Top-pesëshen e plotëson filmi tjetër i animuar “The Croods: A New Age”. Ky projekt i cili ka qenë mjaft i suksesshëm në arkat filmike me javë të tëra, ka arritur që t’i fitojë edhe 520 mijë dollarë të tjera, të cilat i shtohen shumës totale të të hollave të arkëtuara deri më tani, që e kap shifrën prej 54 milionë dollarëve. Ky projekt është vazhdim i filmit të animuar të vitit 2013, “The Croods”. Ai kishte hasur në vështirësi gjatë realizimit, madje në një pikë ishte anuluar nga studioja filmike “Dreamworks”. Përveç kësaj, filmi pësoi disa herë ndryshime në datën e lansimit, por përfundimisht filloi së shfaquri nëpër kinema nga 25 nëntori i vitit 2020.
