Janë publikuar pamjet e para të serialit “Peacemaker” që është vazhdim i filmit, “The Suicide Squad”, dhe fokusohet në personazhin e aktorit John Cena.
Seriali i ri i realizuar nga regjisori James Gunn u paralajmërua zyrtarisht në muajin korrik, një ditë para lansimit të projektit “The Suicide Squad” nëpër kinema.
Ylli i mundjes dhe aktori, John Cena, e luajti rolin e superheroit naiv por të fuqishëm, Peacemaker, në filmin e kaluar të bazuar në librat komik “DC Comics” dhe tani do të përsëris këtë rol në serialin e platformës “HBO Max”, i cili do të lansohet më 13 janar të vitit 2022.
Në ngjarjen “DC FanDome” e cila zuri vend të shtunën më 16 tetor, u zbulua data e lansimit të këtij projekti së bashku me trailerin e tij të parë, ku Peacemaker kthehet në aksion pasi betejës që gati ia mori jetën në “The Suicide Squad”.
Në një intervistë për portalin “Collider”, regjisori Gunn tregoi më shumë hollësi rreth kastës së aktorëve të angazhuar në serialin e ri.
Në projektin e ardhshëm ekzistojnë gjashtë personazhe kryesore që janë, Peacemaker i portretizuar nga Cena, Leota Adebayo e cila luhet nga Danielle Brooks, Emilia Harcourt e portretizuar nga Jennifer Holland, Vigilante i luajtur nga Freddie Stroma, Clemson Murn i cili në serial portretizohet nga Chukwudi Iwuji dhe John Economos, rol ky i luajtur nga Steve Agee.
Sipas regjisorit James Gunn, që të gjashtë personazhet janë në kryeqendër të historisë së serialit. Ai po ashtu ka bërë të ditur se seriali tetë episodesh do të fokusohet në një tregim të madh, ani pse të gjitha personazhet do ta ndjekin rrugëtimin e tyre të veçantë.
