Georgina Rodriguez ka rrëfyer së fundmi se ka qenë duke punuar si asistente e shitjes në dyqanin e një prej firmave të famshme të veshjeve, kur ka takuar ikonën e futbollit, Cristiano Ronaldon.
“Kam kaluar nga shitja e markave luksoze në veshjen e tyre nëpër tepihët e kuq të ngjarjeve më të mëdha botërore”, është shprehur Georgina, e cila është bërë subjekt i serive të reja të Netflix, të titulluara “I Am Georgina”.
Seriali gjashtë-pjesësh dokumenton jetën e saj me lojtarin e Manchester Unitedit, duke nisur nga fillimet e kësaj lidhjeje.
Georgina e cila ka një vajzë me Cristianon dhe është në pritje të binjakëve me të, ka shpjeguar se si kishte lëvizur nga qyteti Jaca i Spanjës, për në Britani të Madhe, kur ishte vetëm 17 vjeç, për të punuar si ndihmëse e një familjeje në Bristol.
Para se ta bënte këtë, Georgina kishte pasur shumë probleme me babain e saj, Jorge Rodriguez, i cili ka vdekur në vitin 2019, dhe i cili ishte i dënuar me 10 vjet burgim për shkak të trafikimit me drogë.
Ndërkohë, nëna i kishte vdekur tragjikisht në një aksident në vitin 2011, një vit para se Georgina të udhëtonte për në Britani.
Pasi kishte arritur në Britani, ajo kishte shprehur interesimin për të punuar në industrinë luksoze mirëpo nuk mund të punonte në dyqane pa e mësuar anglishten. Kështu ajo kishte fituar një punë si asistente e shitjes në dyqanin e “Gucci” në Spanjë, aty ku edhe takoi për herë të parë Ronaldon, dhe këtu jeta e saj ka marrë kthesën e madhe.
Thashethemet thonë se Ronaldo për herë të parë e kishte vërejtur Georginan në një zonë VIP të një ngjarjeje të Dolce&Gabbana në Madrid, pak ditë më vonë.
“Disa ditë më vonë jemi parë sërish në një ngjarje të një brendi tjetër”, ka thënë Georgina.
Gjatë ditëve të para të romancës së tyre, Ronaldo e kishte vozitur Georginan me veturat e tij sportive, që kapnin vlera multi-milionëshe, njëra prej tyre Bugatti.
“Shkova në punë me autobus dhe u ktheva në shtëpi me Bugatti”, ka rrëfyer ajo në dokumentarin për jetën e saj.
Georgina dhe Cristiano janë shfaqur për herë të parë publikisht në nëntor të vitit 2016, kur janë kapur nga paparacët së bashku, në Disneyland Paris.
Tani Georgina është bërë një sensacion në Instagram, me afërsisht 30 milionë ndjekës.
“Kam miliona ndjekës dhe jam gruaja e një prej meshkujve më të dëshiruar në botë”, është shprehur Georgina.
© KOHA. Të gjitha të drejtat janë të rezervuara.
