Studio e njohura filmike të Hollywoodit, “Warner Bros”, “Disney” dhe “Sony”, e kanë ndaluar lansimin e filmave nëpër kinematë e Rusisë, kjo si pasojë e pushtimit të dhunshëm të Ukrainës.
Ky njoftim nënkupton se publikimet e filmave me buxhet të lartë dhe të mirëpritur nga fansat, si “The Batman”, “Turning Red” dhe “Morbius”, nuk do të lansohet sipas planit në këtë shtet.
Refuzimi i shfaqjes së projekteve kinematografike në Rusi vjen pasi qeveritë e vendeve të ndryshme anembanë botës, kanë filluar t’i vënë në funksion sanksionet e tyre kundër këtij shteti.
Këto ditët e fundit, korporata të mëdha globale, përfshirë këtu kompanitë e prodhimit të veturave dhe gjigantët e energjisë, i kanë shkëputur të gjitha bashkëpunimet me Rusinë.
Filmi me buxhet të lartë i studios “Warner Bros”, “The Batman”, planifikohej të lansohej në Moscow këtë të premte.
“Për shkak të krizës humanitare në Ukrainë, ‘WarnerMedia’, po e ndalon shfaqjen e filmit të artistik ‘The Batman’ në Rusi”, deklaroi një zëdhënës i kompanisë së famshme filmike.
Ndërkohë, “Disney” e ka vonuar lansimin në Rusi të filmit të animuar “Turning Red”, të studios “Pixar”.
“Marrë parasysh pushtimin e paprovokuar të Ukrainës dhe krizën tragjike humanitare, po e pauzojmë lansimin e filmave tanë në Rusi”, shkruhej në deklaratën për media të lëshuar nga “Disney”.
Gjigandi i kinematografisë shtoi se do të punojë me organizatat e ndryshme joqeveritare për të ofruar ndihmë urgjente dhe ndihma të tjera humanitare për refugjatët.
Studioja “Sony” po ashtu e ka pezulluar lansimin e projektit të shumëpritur “Morbius”, i cili bazohet në librat komik me supeheronj “Marvel”.
“Duke pasur parasysh aksionin e vazhdueshëm ushtarak në Ukrainë dhe pasigurinë dhe krizën humanitare që po shpaloset në atë rajon, ne do të ndalojmë lansimet e planifikuara në Rusi. Mendimet dhe lutjet tona janë me të gjithë ata që janë prekur nga kjo luftë dhe shpresojmë që kjo krizë të zgjidhet shpejt”.
Ndërkohë, platforma Netflix ka bërë të ditur se nuk do t’i respektojë rregullat e reja ruse për të transmetuar kanale të mbështetura nga ky shtet.
Rrjetet sociale si Twitter dhe Facebook, po ashtu kanë filluar me limitimin e prezencës së burimeve të lajmeve të mbështetura nga Rusia, në platformat e tyre pasi këto burime janë akuzuar për përhapjen e informacioneve të rreme rreth pushtimit të Ukrainës nga Rusia.
© KOHA. Të gjitha të drejtat janë të rezervuara.
