Yjet e njohur të muzikës, Billie Eilish, Lil Nas X dhe grupi nga Korea Jugore, “BTS”, do të jenë ndër performuesit e ceremonisë së sivjetme të ndarjes së çmimeve “Grammy”.
Ngjarja më e rëndësishme në industrinë e muzikës pritet të mbahet në më 3 prill në Las Vegas, dhe Akademia e Regjistrimit e cila gjendet prapa organizimit të saj, tashmë i ka bërë të ditur emrat e disa prej artistëve të konfirmuar si performues të mbrëmjes, si Billie Eilish, Lil Nas X, grupi “BTS”, dyshja “Brothers Osborne”, Olivia Rodrigo, Brandi Carlile dhe Jack Harlow. Pritet të shihet nëse kësaj liste do t’i shtohen edhe më shumë emra të yjeve të muzikës.
Të gjithë performuesit janë në listën e të nominuarve, me ç’rast Eilish dhe Rodrigo garojnë krahas njëra-tjetrës në tri kategoritë kryesore të mbrëmjes, “Albumi i vitit”, “Incizimi i vitit” dhe “Kënga më e mirë e vitit”.
Jon Batiste është artisti më i nominuar në këtë sezon të shpërblimeve me 11 shosh. Edhe më impresionues është fakti se nominimet e tij variojnë në kategori të zhanreve të ndryshme, si R&B, Jazz, muzikë klasike dhe të tjerë. Justin Bieber, Doja Cat dhe H.E.R. kanë arritur të nominohen në gjithsej 8 kategori, e pas tyre renditen Billie Eilish dhe Olivia Rodrigo me nga shtatë nominime secila.
Sa i takon kategorive kryesore edhe këtë vit kemi artist të zhanreve të ndryshme të nominuar për çmime të tilla si, “Incizimi i vitit”, ku garojnë Jon Batiste, Justin Bieber, Tony Bennett dhe Lady Gaga, grupi “ABBA”, Doja Cat, Billie Eilish, Lil Nas X, Olivia Rodrigo dhe grupi “Silk Sonic”.
Për çmimin “Albumi më i mirë” të nominuar janë yjet Jon Batiste, Justin Bieber, Tony Bennett dhe Lady Gaga, Doja Cat, Billie Eilish, Lil Nas X, H.E.R, Taylor Swift dhe Kanye West.
E në kategorinë “Kënga më e mirë”, të sivjet garojnë: Ed Sheeran me “Bad Habits”, Alicia Keys dhe Brandi Carlile me “A Beautiful Noise”, Olivia Rodrigo me “Drivers License”, H.E.R me “Fight For You”, Billie Eilish me këngën “Happier Than Ever”, Doja Cat dhe Sza me “Kiss Me More”, grupi “Silk Sonic” me këngën “Leave The Door Open”, Lil Nas X me “Montero”, Justin Bieber me “Peaches” dhe Brandi Carlile me këngën “Right On Time”.
Këngëtaret me prejardhje shqiptare dhe famë botërore, si Dua Lipa, Rita Ora, Bebe Rexha dhe Ava Max, kë vit nuk arritën ta marrin ndonjë nominim.
Ndërkaq ylli i njohur i muzikës, Jay-Z, është bërë artisti më i nominuar për çmim “Grammy” i të gjitha kohërave, kjo pasi i pranoi edhe tri nominime ekstra për ceremoninë e vitit 2022. Reperi i famshëm amerikan i ka fituar gjithsej 83 nominime në emër të tij, duke e mundur kampionin e kaluar me më së shumti nominime, Quincy Jones, i cili i ka 80 sosh. Jay-Z ka arritur që gjatë karrierës t’i fitojë gjithsej 23 çmime, “Grammy”.
Ceremonia “Grammy” fillimisht ishte menduar të mbahet më 31 janar në Los Angeles, por pësoi shtyrje për shkak të rritjes së rasteve me COVID-19.
Komediani dhe prezantues i emisionit “Daily Show”, Trevor Noah, pritet të kthehet në rolin e prezantuesit për të dytin vit me radhë.
© KOHA. Të gjitha të drejtat janë të rezervuara.
