Rok grupi legjendar, “The Rolling Stones”, e ka anuluar një koncert në Amsterdam kjo pasi vokalisti i grupit, Mick Jagger, rezultoi pozitiv me koronavirus, raportoi të martën CNN.
Diagnoza e Jaggerit u konfirmua në një komunikatë për media në llogarinë e bendit në Instagram.
“Grupi ‘The Rolling Stones’ është detyruar ta anulojë koncertin e sotëm në Amsterdam, kjo pasi Mick Jagger rezultoi pozitiv me COVID-19. Të gjithë pjesëtarëve të grupit u vjen keq për shtyrjen e koncertit, por siguria e publikut, kolegëve muzikantë dhe e gjithë ekipit të turneut është më me prioritet”.
Sipas kësaj deklarate, koncerti do të mbahet në një datë tjetër dhe biletat e blera tashmë nga fansat do të jenë të vlefshme.
Në vitin 2019 këngëtari 78-vjeçar, Mick Jagger, iu nënshtrua operacionit në zemër për ta zëvendësuar një valvul. Por në përgjithësi, pavarësisht moshës së shtyrë, anëtarët e mbetur të grupit e gëzojnë një shëndet të mirë dhe shquhen për energjinë që e sjellin në skenë me performancat tipike të yjeve të muzikës rok.
Turneu veror i “The Rolling Stones” ka për qëllim ta nderojë 60-vjetorin e themelimit të grupit.
© KOHA. Të gjitha të drejtat janë të rezervuara.
