Këngëtarja me prejardhje kosovare dhe famë botërore, Rita Ora, i ka paralajmëruar fansat se albumi i saj i tretë do të publikohet në fillim të vitit të ardhshëm.
Ylli i hitit “Anywhere” që së fundmi mbajti koncert në Shqipëri, ka kohë që është duke punuar me shumë përkushtim në realizimin e albumit muzikor tejet personal, i cili vjen pas atij vitit 2018, “Phoenix”. Ora i ka premtuar fansat se tani e tutje, mund të presin shumë më shumë këngë dhe projekte filmike nga ajo.
Në një intervistë të fundit, pop-këngëtarja 31-vjeçare e pranoi se ka pasur problem ta përballojë presionin e të qenit në qendër të vëmendjes së publikut, dhe deklaroi se miqtë e saj të afërt dhe familja e kanë ndihmuar t’i tejkalojë momentet kur ndihej e gatshme të heqë dorë nga karriera.
Ora, e cila së fundmi e kurorëzoi lidhjen me regjisorin nga Zelanda e Re, Taika Waititi, për gazetën “The Sun” deklaroi: “Doja të hiqja dorë nga karriera. Nuk isha e sigurt nëse ja vlente gjithë ai presion. Sa më e famshme që bëhesha, e kuptoja se njerëzit të admirojnë dhe presin shumë nga ti. Ti shndërrohet në model për të tjerët dhe nganjëherë nuk je e gatshme për diçka të tillë, sepse krejt çka ti ke dëshiruar gjithmonë është që të bësh muzikë. Kurse tani, ndiqesh me miliona njerëz në rrjetet sociale dhe kjo është një ngarkesë e madhe nga ana psikike. Me rëndësi është të qëndrosh vetvetja dhe të mbështetesh tek miqtë të cilët i njeh me vite”.
Kur u pyet se çfarë kishte bërë gjatë vizitës në Shqipëri, Rita u përgjigj: “Kam punuar diçka rreth albumit të ri, i cili vjen në janar të vitit të ardhshëm. Do të jetë i mrekullueshëm. Mund të prisni më shumë muzikë dhe filma nga unë. Ëndrra ime është t’ia vërtetoj njerëzve se është e mundur ta bësh më shumë se një punë. Mund të jesh këngëtare, aktore, valltare, nënë, teze, të gjitha në të njëjtën kohë. Unë dua të provoj t’i bëjë të gjitha. Dhe tani që i kam bërë 30 vjet, është koha të angazhohem më shumë drejt qëllimeve të mia”.
Aktorja e filmave “Fifty Shades” po ashtu i paralajmëroi fansat se do të detyrohen të dehen, kur t’i dëgjojnë këngët e saj të reja.
© KOHA. Të gjitha të drejtat janë të rezervuara.
