Rita Orës nuk i pëlqen ta përziejë jetën private me atë profesionale
Foto: AP/Associated Press
Ylli i muzikës pop, Rita Ora, shquhet për lidhjet romantike me personalitete të njohura. Gjatë vjetëve ajo ka qenë e lidhur me disa emra të njohur të showbizit, dhe jo të gjitha këto lidhje kanë përfunduar në mënyrë shoqërore.
Një prej ndarjeve më të njohura të Ritës mbetet ajo me producentin Calvin Harris. Ajo ndarje ishte aq e keqe sa që këngëtarja ndonjëherë i shkurtonte intervistat, kur pyetej për producentin skocez. Por, në një intervistë të fundit, Ora foli për ndarjen e saj me Harris dhe se si ndodhi gjithçka.
Këngëtarja me prejardhje kosovare dhe famë botërore tani është në lidhje të lumtur me regjisorin nga Zelanda e Re, Taika Waititi. Por, në të kaluarën ajo ishte përballur me disa situata të pakëndshme, kur bëhet fjalë për lidhjet romantike, shkruan portali “Animated Times”.
Rita Ora dhe Calvin Harris ishin në lidhje nga viti 2013 deri më 2014. Në atë kohë u raportua se Harris ishte ndarë me të sepse donte më shumë privatësi. Por, sipas Orës, puna së bashku në mënyrë profesionale i shkaktoi disa tensione mes tyre. Çifti e realizoi këngën “I Will Never Let you Down” gjatë kohës sa ishin bashkë. Por pas ndarjes së tyre, Calvin Harris i refuzoi Orës lejen ligjore për ta interpretuar këtë këngë në koncerte dhe ngjarje të ndryshme muzikore.
Në një intervistë të realizuar në vitin 2014, këngëtarja foli rreth arsyes pse Harris nuk e lejoi ta performonte këtë këngë.
“Për këdo që nuk e kupton se si funksionojnë këto gjëra, ai e ka shkruar dhe prodhuar këngën”.
Pas kësaj deklarate, Calvin Harris i shfrytëzoi rrjetet sociale për ta rrëfyer anën e tij të historisë, duke thënë: “Ju e njihni vetëm njërën anë të kësaj historie, sepse unë kam zgjedhur të mos deklarohem për mediat. Por, ta dini që i kam arsyet e mia të mira për të vepruar kështu”.
Mirëpo së fundmi, Rita deklaroi se lidhja me ish të dashurin e saj, Harris, filloi të keqësohej kur ata filluan t’i përziejnë jetët personale me ato profesionale.
“Atëkohë unë isha e mahnitur me të. Isha në atë pikë të lidhjes ku më dukej se ai nuk mund të bënte asnjë gabim. Mendova se ai më mbronte nga çdo gjë dhe se kurrë nuk do të më drejtonte gabim. Por më pas u lansua kënga ‘I Will Never Let You Down’ dhe gjithçka filloi të bëhej e çuditshme mes nesh”, deklaroi ylli i hitit “Ritual”.
Rita Ora tani është e lidhur me Taika Waititin. Ata e filluan lidhjen në prill të vitit 2021 dhe kanë qenë të pandarë nga atëherë. Së fundmi, çifti e kurorëzoi lidhjen me martesë.
Waititi madje shpesh flet për prejardhjen e këngëtares, duke e shprehur admirimin e tij për shqiptarët. Në një video të realizuar nga kjo dyshe për revistën “Vogue”, ata shihen duke e kaluar një mbrëmje së bashku në Düsseldorf të Gjermanisë. Në një moment ata kalojnë pranë një picerie me pronarë shqiptarë, ku ndalen edhe për të ngrënë pica.
“Shqiptarët janë më të mirët. Ata e gjejnë njëri-tjetrin kudo që janë. Nëse do të jesh me dikë që vjen nga Kosova, atëherë më e mira që mund ta bësh është ta mësosh gjuhën shqipe”, dëgjohet duke thënë regjisori i shpërblyer me “Oscar”.
