Biletat për koncertin e parë të turneut të ardhshëm të Beyoncés, “Renaissance World Tour” tashmë janë shitur dhe grupi i menaxhimit të koncerteve, “Live Nation”, bëri të ditur se një koncert i dytë në Stokholm është shtuar për shkak të kërkesës së lartë.
Turneu që e shënon rikthimin e yllit të muzikës R&B në skenë, fillon më muajin maj në Suedi dhe përfshinë koncerte në vende të tilla si, Londra, Parisi, Barcelona, Toronto, dhe qytete të tjera të Shteteve të Bashkuara. Ndërkaq, performanca e fundit e Beyonces pritet të zë vend në New Orleans më 27 shtator.
Nuk janë dhënë shumë hollësi se sa shpejt fansat e superyllit i siguruan të gjitha biletat për koncertin e 10 majit në Stokholm. Por, biletat për koncertin e dytë në kryeqytetin e Suedisë dolën në shitje të mërkurën.
Te dyja koncertet e Beyoncé do të mbahen në “Friends Arena”, një stadium i përshtatshëm për evente të ndryshme, me një çati që mund të paloset dhe kapacitet për t’i akomoduar deri në 65 mijë persona.
Performanca e këtij viti do të jetë turneu i parë solo i Beyonces nëpër botë, që nga turneu i vitit 2016, “Formation”. Ajo u shfaq për herë të fundit në Stokholm në vitin 2018, ndërsa ishte në turne me bashkëshortin e saj, Jay Z.
“Renaissance”, albumi të cilin këngëtarja e lansoi vitin e kaluar, e nderon muzikën e zhanrit dance.
Në ceremoninë e fundit të ndarjes së shpërblimeve “Grammy”, Beyoncé i fitoi gjithsej katër trofe, “Kënga më e mirë R&B”, “Incizimi më i mirë dance/electronic”, “Albumi më i mirë dance/electronic” dhe “Performanca më e mirë tradicionale e zhanrit R&B”. Kështu, ajo arriti të bëjë histori si artistja më e shpërblyer në historinë e çmimeve “Grammy”, me 32 sosh.
© KOHA. Të gjitha të drejtat janë të rezervuara.
