Uebfaqja e njohur e videove, YouTube, ka pezulluar pagesat për kanalin e aktorit të famshëm, Russell Brand pas akuzave për ngacmim seksual, dhunim dhe abuzim.
“Nëse sjellja e një krijuesi videosh jashtë platformës dëmton përdoruesit, punonjësit apo ekosistemin tonë, ne ndërmarrim veprime për të mbrojtur komunitetin”, ka thënë një zëdhënës i YouTube për “Financial Times”.
Një zëdhënës ka thënë se veprimi i YouTubet ishte në përputhje me mënyrën se si e ka zbatuar kompania politikën e saj në të kaluarën, duke përmendur vendimet e mëparshme për të pezulluar pagesat për “YouTubers”, James Charles dhe David Dobrik pas akuzave për sjellje të gabuar seksuale.
Brand në shtator të vitit 2022 pati deklaruar se do të largohej nga YouTube, pasi u shpreh se një nga videot e tij u fshinë nën dyshimet për keqinformim rreth pandemisë COVID-19. Por kanali i tij që atëherë ka mbetur aktiv.
Gjithashtu edhe turneu live “Bipolarizimi” i komedianit dhe aktorit është shtyrë.
Shfaqja e parë që do të preket nga kjo ngjarje është ajo në “Royal Windsor” në Britani. Menaxhmenti i teatrit nëpërmjet një deklarate ka njoftuar zyrtarisht për shtyrjen.
Brand ka mohuar të gjitha akuzat. Pas akuzave të Brand fansat po mendojnë se ish-gruaja e tij, Katy Perry e ka ditur gjatë tërë kohës për këtë gjë. Megjithatë ajo e ka përshkruar marrëdhënien me të si “shumë të kontrolluar” nga Brandi.
“Atij nuk i pëlqente që unë të isha shefi nëpër turne. Pra, kjo ishte vërtet e dëmshme, dhe ishte shumë kontrolluese, gjë që ishte shqetësuese”, tha këngëtarja e hitit “Teenage Dream” për Vogue atë kohë.
Komediani dhe aktori britanik Brand u akuzua gjatë fundjavës për përdhunim, sulm seksual dhe sjellje të tjera abuzive. Gra të shumta pretenduan se qenë sulmuar seksualisht nga ai midis 2006 dhe 2013, sipas një hetimi që e kanë bërë publik mediat “Times of London” dhe “channel 4”.
© KOHA. Të gjitha të drejtat janë të rezervuara.
