Agim Ademi flet për dënimin me burg efektiv, thotë se është ankuar në Supreme

Agim Ademi flet për dënimin me burg efektiv, thotë se është ankuar në Supreme

Florim Maliqaj Florim Maliqaj 20 March 2020 17:56

Kryetari i Federatës së futbollit të Kosovës, Agim Ademi, për herë të parë ka folur për dënimin e tij me 9 muaj burg efektiv nga Gjykata e Apelit, e cila e vërtetoi dënimin e Themelores për veprën penale të detyrimit në tentativë.

Në një intervistë ekskluzive për “Sportin në KTV”, Ademi ka thënë se dënimi i tij nuk ka të bëjë me futbollin, si dhe zbulon se ka bërë ankesë në Gjykatën Supreme.

Ai theksoi se çdo ditë është në Prishtinë, duke e kryer punën e tij, dhe megjithëqë kaluan 24 ditë që nga publikimi i vendimit nga gjykata e shkallës së dytë, nuk frikësohet se mund të arrestohet.

I pari i FFK-së premton se nëse edhe Supremja vendos kundër tij, nuk do ta ngrijë postin e kryetarit, por do të lëshojë rrugë.

Ademi theksoi se UEFA e ka mbështetur që të ndjekë të gjitha rrugët ligjore, kurse krahasimet me dënimet e Blaterit dhe Platinisë i konsideron të paqëndrueshme.

Sipas tij, dikush i është gëzuar dënimit të tij. Ai ka edhe një mesazh për opozitën, të cilën e konsideron në numër të vogël.

Ademi i ka falënderuar të gjithë për përkrahjen, e cila, sipas tij, ka ardhur si rezultat i punës së mirë që ka bërë.

Ndër të tjera, 58-vjeçari ka folur edhe për situatën e krijuar në futbollin e Kosovës, pas pezullimit të të gjitha ndeshjeve shkaku i koronavirusit.

Ademi ka pohuar se FFK-ja i ka ndihmuar klubet me mjetet financiare, si dhe e ka hartuar edhe një plan të veprimit duke siguruar sasi të miellit, nëse dikush nga sportistët ka nevojë për ndihmë.

Kryetari i Federatës së futbollit të Kosovës beson se nëse nuk ka rritje të numrit të të infektuarave, atëherë shumë shpejt mund të rikthehet futbolli i Kosovës.

Ai beson se edhe ndeshja kundër Maqedonisë së Veriut do të zhvillohet në fillim të muajit qershor.

Madje, për t’i ndihmuar lojtarët, FFK-ja kishte planifikuar edhe aeroplan privat.

Kryetari i FFK-së u është përgjigjur kritikave për zhvillimin e ndeshjes Kosovë – Rusi në Gjermani. Sipas tij, vendimi ka qenë i UEFA-s, e cila i ka hequr edhe të gjitha shpenzimet financiare.

Agim Ademi është në krye të Federatës së Futbollit të Kosovës që nga 6 korriku i vitit 2018. Ai u zgjodh në krye të FFK-së pas vdekjes së Fadil Vokrrit.

© KOHA. Të gjitha të drejtat janë të rezervuara.

Komentet

Shto koment

Të ngjashme