Sport

Ballkani shkarkon Shkëmbin pas largimit nga gara për titull

 

Bledi Shkëmbi nuk do të jetë më trajner i Ballkanit. Shkëmbi është shkarkuar nga posti i trajnerit pas disfatës së pësuar të enjten nga Arbëria 3:2, në kuadër të xhiros së 33-të të Superligës së Kosovës në futboll. Njoftimin për largimin e Shkëmbit e ka bërë të ditur klubi nga Suhareka, pak pas përfundimit të ndeshjes kundër Arbërisë. Me humbjen e pësuar 3:2 nga Arbëria të enjten, Ballkani mbetet prapa në luftën për titullin e kampionit me Prishtinën dhe Dritën, kur kanë mbetur edhe tri xhiro deri në fund të edicionit. Ishte edhe humbja e dytë rresht për Ballkanin dhe atë nga dy skuadrat që janë në garë për mbijetesë. Para pak ditësh pësoi edhe nga Drenica. Ballkani mbetet në vendin e tretë me 67 pikë, pesë më pak se liderja Prishtina dhe dy më pak se Drita, ndërsa Arbëria ka dalë nga pozita që dërgon direkt në Ligën e Parë. Është ngritur në vendin e tetë me 36 pikë, vend që siguron ndeshjen e barazhit. Me pikë të njëjta është edhe Trepça ’89, por që ka rënë në pozitën e nëntë.

“Pas rezultateve të dobëta, sidomos në dy ndeshjet e fundit, klubi ka marrë vendim të ndërpres bashkëpunimin me trajneri Bledi Shkëmbi. E falënderojmë për punën e palodhshme dhe suksese në të ardhmen”, shkruan në njoftimin e Ballkanit. Shkëmbi e mori përsipër drejtimin e Ballkanit më 27 dhjetor të viti të kaluar.