Dosja e futbollistit Astrit Selmani ishte dorëzuar e pakompletuar në Presidencë dhe për këtë reprezentuesi nuk e kishte marrë shtetësinë e Kosovës deri në këtë javë. Në mungesë të shtetësisë, përkatësisht të pasaportës, Selmani nuk ishte në dispozicion për tri ndeshjet kualifikuese për Botëror që Kosova i luajti më herët, këtë muaj, ndonëse ishte në stolin e rezervistëve.
Dosja e futbollistit Astrit Selmani ishte dorëzuar e pakompletuar në Presidencë dhe për këtë reprezentuesi nuk e kishte marrë shtetësinë e Kosovës deri në këtë javë. Në mungesë të shtetësisë, përkatësisht të pasaportës, Selmani nuk ishte në dispozicion për tri ndeshjet kualifikuese për Botëror që Kosova i luajti më herët, këtë muaj, ndonëse ishte në stolin e rezervistëve.
Në Presidencë kanë thënë se i shqyrtojnë me prioritet kërkesat për fitimin e shtetësisë nga ana e sportistëve. Vetëm këtë vit shtetësia e Kosovës është dhënë për 16 persona, “për interes të veçantë sportiv”. Dekrete të tjera për shtetësi mund të nënshkruhen nga presidentja e vendit, Vjosa Osmani, deri në fund të vitit.
Pos Selmanit, prej futbollistëve shtetësinë e Kosovës e kanë fituar edhe: Destan Bajselmani, Altin Zeqiri, Arian Kastrati, Endrit Morina, Leo Besson e Arlind Sejdijaj. Në listë shtohen edhe futbollistet Elizabeta Ejupi dhe Venera Rexhi.
Prej hendbollistëve shtetësinë e kanë fituar: Kristina Ukaj, Njoma Zogaj, Natalija Milatoviq e Shaban Zogaj. Milatoviq është malazeze, ndërsa ka disa vjet që luan për Istogun. Ka luajtur për U19 të Kosovës në verë.
Shtetësia me dekret të Presidentes i është ndarë edhe basketbollistes amerikane, Alexis Renee Tolefree, që tashmë ka debutuar për Kosovën dhe ishte prej lojtareve kryesore.
Por dhënia e shtetësisë nuk kufizohet vetëm në sportet që janë të zhvilluara në Kosovë.
Në një përgjigje të Presidencës për KOHËN bëhet e ditur se presidentja Osmani shtetësinë këtë vit ia ka dhënë edhe kalërueses Greta Elise Ivezaj, si dhe Besim Alitit, sekretar i përgjithshëm i Komitetit Olimpik të Kosovës. Shtetësia për Alitin është dhënë në cilësinë e “ekspertit të sportit”.
“Presidenca, pas rekomandimit të federatave përkatëse të sportit, kompletimit të dokumentacionit përkatës të sportistëve që e kërkojnë shtetësinë e Republikës së Kosovës dhe pas marrjes së informatave plotësuese nga institucionet përkatëse dhe të sigurisë, me qëllim të plotësimit të të dhënave për personin e huaj (sportistin) që ka kërkuar fitimin e shtetësisë dhe verifikimin se a ka ndonjë pengesë ligjore për fitimin e shtetësisë, në vazhdimësi u ka dhënë prioritet këtyre kërkesave. Kërkimi i informatave plotësuese nga institucionet e sigurisë është kriter i përcaktuar me ligj. Nga janari i këtij viti presidentja ua ka dhënë shtetësinë gjashtëmbëdhjetë personave të huaj, për interes të veçantë sportiv”, thuhet në një përgjigje me shkrim të Presidencës.
Pra, tashmë shtetësinë e Kosovës e ka edhe një kalëruese. Bëhet fjalë për Greta Ivezaj, 20-vjeçare. Ajo prej kur ishte pesëvjeçare merret me njërën prej disiplinave të kalërimit. Sipas një shkrimi në revistën e KOK-ut, Olimpi, Greta është e lindur në SHBA, ndërsa babai i saj është i lindur në Malësi të Madhe të Shkodrës. Gjyshërit e saj janë të lindur në Mal të Zi, por kanë jetuar për shumë vjet në Kosovë, para se të migronin në SHBA, në vitet nëntëdhjetë të shekullit të kaluar. Komiteti Olimpik i Kosovës ka ndihmuar Gretën ta dorëzojë kërkesën për shtetësi të Kosovës. Ajo karrierën e zhvillon në SHBA, ndërsa një kohë qëndroi edhe në Kinë.
“Kur fillova të mendoj për Olimpiadën, vendi më i mirë për ta përfaqësuar ishte Kosova, që nuk ka ndonjë garues në këtë sport. Unë besoj se do ta përfaqësoja më së miri në garat ndërkombëtare, pse jo një ditë edhe në Lojërat Olimpike”, ka thënë Greta Ivezaj.
Ndërkohë Besim Aliti në fillim të shtatorit është emëruar sekretar i përgjithshëm i Komitetit Olimpik të Kosovës, pas shkarkimit të Shasivar Haxhijajt. Deri në shtator ishte këshilltar i presidentit të KOK-ut, Ismet Krasniqi.
Aliti më parë ka punuar në organizimin e ngjarjeve ndërkombëtare sportive. Ish-karateisti ka studiuar në Zagreb, ku edhe ka jetuar. Është me prejardhje nga Maqedonia e Veriut, ndërsa tashmë mban njërën prej pozitave të rëndësishme në sportin kosovar. Dhe po ashtu është shtetas i Kosovës.
© KOHA. Të gjitha të drejtat janë të rezervuara.
