Sport

Kosova gati për ndeshjen në Suedi, pritet përkrahja nga tribunat

 

Formën e mirë që Përfaqësuesja e Kosovës e shfaqi gjatë ndeshjeve të muajit shtator, përzgjedhësi Bernard Challandes pret që lojtarët ta tregojnë edhe në duelin kundër Suedisë. Zvicerani Challandes në konferencën për shtyp të mbajtur të premten, ka thënë se Kosova duhet ta konfirmojë formën edhe në ndeshjen që do të luhet në stadiumin “Friends Arena” në Solna. Ndeshja Suedi - Kosovë luhet të shtunën nga ora 18:00 dhe i takon Grupit B të kualifikimeve për Kampionatin Botëror “Katari 2022”. Muajin e shkuar, Kosova luajti tri ndeshje - me Gjeorgjinë, Greqinë dhe Spanjën. Triumfoi ndaj Gjeorgjisë (1:0), barazoi me Greqinë (1:1) dhe u mposht nga Spanja (2:0). Aktualisht, zë vendin e katërt në grup me katër pikë, pesë më pak se Suedia që renditet e dyta dhe ka një ndeshje më pak të luajtur. Challandes pas konferencës e ka mbajtur stërvitjen e fundit me ekipin në stadiumin ku Kosova do të përballet me Suedinë, ekip që do të ketë mungesa të mëdha.

Kosovës për herë të parë që nga grumbullimi iu bashkua sulmuesi i krahut, Lirim Kastrati që është pjesë e Legias së Varshavës. Kastrati u bashkua me ekipin të enjten pasdite, kurse në Solna mbajti stërvitjen e parë me pjesën tjetër të grupit, që ka punuar nga e hëna në Prishtinë. Ai u stërvit i diferencuar prej grupit. Ardhja e Kastratit deri në momentet e fundit nuk ka qenë e sigurt për shkak të një lëndimi në gju. Megjithatë, ai me të marrë dritën jeshile nga klubi i tij pas ekzaminimeve të bëra, i është bashkuar pjesës tjetër të ekipit.