Shqiptari që studion fetë, shkëlqen në Botërorin e boksit në Beograd
Me fytyrë të gjakosur është larguar nga ringu boksieri kroat, Filip Kolar.
Premium
Me fytyrë të gjakosur është larguar nga ringu boksieri kroat, Filip Kolar.
Të premten mbrëma në kuadër të Kampionatit Botëror të boksit amator, që po mbahet në Beograd, Kolar u përball me boksierin shqiptar, Don Emini. Emini e prezanton Norvegjinë, vend në të cilin edhe jeton. Dhe ndaj kroatit ai ishte bindës.
Me teknikë të nivelit të lartë, duke u rrezikuar fare pak, Don Emini ka dominuar ndaj kroatit Kolar. Ka fituar me vendim unanim të gjyqtarëve, përkatësisht me rezultatin 5:0. Të gjithë gjyqtarët e vlerësuan Eminin fitues, në të tri raundet.
Ai boksoi në kategorinë deri 71 kilogramë, ndërsa me fitore kaloi në një të tetën e finales. Ishte fitorja e parë për Eminin, ndërsa një tjetër fitore e afron te zona e medaljeve. Takohet me boksier nga Jordania në meçin e ardhshëm.
Shumë i lëvizshëm në ring, Emini ka goditur vazhdimisht boksierin kroat dhe me shmangie mjeshtërore ka bërë që të rrezikohet rrallë. Gjyqtarja në ring ka ndërprerë meçin për t’i dhënë ndihmë mjekësore boksierit kroat, pas çarjes që ai pësoi në arkadë.
“Na erdhi shumë keq që ekipin e Kosovës nuk e lan të marrë pjesë në këtë Botëror. Por do të provojmë ne diaspora të prezantojmë kombin”, ka thënë babai i boksierit, Bekim Emini, që ka folur edhe në emër të Donit. Ai po e shoqëron reprezentuesin e Norvegjisë në Beograd dhe ishte bashkë me të kur u kontaktua nga KOHA. “Jemi të lumtur që meçi është përcjellë edhe në Kosovë”, ka shtuar Emini.
Familja Emini është nga Shkupi. Doni është i vetmi boksier shqiptar, pa përfshirë ata të Shqipërisë e Maqedonisë së Veriut, që paraqitet në Botëror. Fitore të premten mbrëma shënoi edhe Alban Beqiri i Shqipërisë, që po ashtu ishte impresiv. Tashmë janë eliminuar Nelson Hysa e Indrit Laçi të Shqipërisë, si dhe Jasin Lama i Maqedonisë së Veriut. Arsim Etemi, që po ashtu prezanton Maqedoninë e Veriut, në ring ngjitet të shtunën.
Boksierët e Kosovës nuk janë lejuar të marrin pjesë në Botëror. Ata nuk janë lejuar fare të hyjnë në territorin e Serbisë dhe kjo ka bërë bujë fundjavën e kaluar. Botërori, megjithatë, nisi dhe po zhvillohet pa ta.
Norvegjia nuk është prej vendeve të njohura për boks, por Don Emini po bën karrierë të mirë. Ai në të njëjtën kohë e zhvillon karrierën në boks dhe ndjek studimet universitare. 21-vjeçari, që jeton në Jessheim, studion për teologji dhe shkenca shoqërore në Universitetin e Oslos. Mediat norvegjeze kanë shkruar shumë për pjesëmarrjen e Eminit në Botëror dhe natyrisht për angazhimin e dyfishtë të tij.
Për shqiptarin e ringut asnjëherë nuk ka qenë alternativë që të lërë studimet anash dhe të fokusohet 100 për qind në boks.
“Kështu po funksionon mirë për mua”, ka thënë Don Emini për “khrono.no”.
Ai vlerëson se mund të jetë i suksesshëm në të dy drejtimet, ndërsa e di që duhet përpjekje shtesë për këtë. Studimet për fe dhe shkenca sociale i ka nisur këtë vjeshtë në universitetin prestigjioz të Oslos. Shumë prej profesorëve janë çuditur kur Doni u ka treguar se është boksier i nivelit të lartë ndërkombëtar.
Doni ka tituj të Norvegjisë për juniorë e seniorë, ndërsa i ka tri paraqitje në kampionate evropiane.
Ai ushtron dy herë në ditë, ndërsa ka kohë të mjaftueshme edhe për të studiuar. Ai e ka përfunduar shërbimin ushtarak në Norvegji kohë më parë, ndërsa pas shkollës së mesme kishte pauzuar një vit nga shkollimi, për të punuar. Ambiciet e tij lidhen edhe me studimet, jo vetëm me boksin.
Një prej synimeve e ka të bëhet mësues, në shkollë të mesme apo shkollë të lartë. Një tjetër synim e ka paraqitjen në lojërat olimpike “Parisi 2024”.
“Olimpiada është gjë e rëndësishme për ne boksierët. Medalja e artë në Lojëra Olimpike është gjëja më e madhe që mund të arrish”, ka thënë Don Emini.
Momentalisht ai është i fokusuar që të paraqitet sa më mirë në Beograd. Dhe që pos Norvegjisë të bëjë krenarë të gjithë shqiptarët.
