Real Madrid dëshiron ta harrojë shpejt sulmuesin Kylian Mbappe dhe ta kthejë fokusin në finalen e Ligës së Kampionëve kundër Liverpoolit. Katër ditë para finales që do të luhet në “Stade de France” në periferi të Parisit, trajneri i Real Madridit, Carlo Ancelotti, dhe lojtarët e tij u përpoqën të mos flisnin për sulmuesin francez dhe për vendimin e tij për të qëndruar te Paris Saint-Germaini. Mbappe bëri njoftimin befasues të shtunën e shkuar, duke u dhënë një goditje të madhe Real Madridit dhe tifozëve të tij, të cilët ishin të sigurt se ai do të luante në kryeqytetin spanjoll sezonin e ardhshëm.
“Është shumë e qartë për ne që duhet të mendojmë për gjërat tona”, tha Ancelotti të martën. “Ne kurrë nuk kemi folur për lojtarë të skuadrave të tjera. Ne i respektojmë të gjithë, çdo vendim, çdo klub. Ne duhet të bëjmë punën tonë. Është shumë e qartë se çfarë duhet të mendojmë, që është përgatitja për finalen e Championsit që na pret të shtunën”.
Real Madridi si klub nuk kishte bërë asnjë koment në lidhje me vendimin e Mbappes, megjithëse disa lojtarë nxituan të postonin mesazhe duke lavdëruar klubin dhe duke thënë se ishte një nder të veshin fanellën e tij. Mbappe kishte thënë vitin e kaluar se donte të bashkohej me Real Madridin, por PSG-ja hodhi poshtë ofertën prej afro 200 milionë eurosh për lojtarin. Sulmuesi francez pritej gjerësisht të përfundonte lëvizjen e tij në Madrid, pasi u bë lojtar i lirë në fund të këtij sezoni, por në vend të kësaj zgjodhi të nënshkruante një kontratë trevjeçare me PSG-në.
“Unë kurrë nuk kam folur për lojtarë që nuk luajnë për Real Madridin dhe nuk do të flas kurrë për lojtarë që nuk luajnë për Real Madridin”, insistoi Ancelotti.
Vendimi i Mbappes për të refuzuar Real Madridin ishte tema më e përfolur në Spanjë në ditët e fundit, duke lënë në fund finalen e Ligës së Kampionëve. Real Madridi do të përpiqet të fitojë titullin e 14-të evropian të shtunën në Paris, në finalen e tij të pestë të Ligës së Kampionëve në tetë sezonet e fundit.
Real Madridi fitoi trofeun e dhjetë evropian tetë vjet më parë me Ancelottin si trajner, më pas fitoi tre tituj radhazi nga viti 2016 deri në vitin 2018 me Zinedine Zidane në krye. Reali e pati mposhtur Liverpoolin në finalen e vitit 2018 të zhvilluar në Kiev.
“Kishte shumë më tepër presion atëherë në vitin 2014. Kishin kaluar disa vjet që kur Reali kishte fituar Ligën e Kampionëve. Ishte pothuajse një obsesion për të gjithë”, tha Ancelotti. “Tani tifozët e Realit janë të motivuar, por jo aq të fiksuar pas këtij trofeu, dhe mendoj se kjo mund të na jep një avantazh në këtë finale”.
Ancelotti, i cili mund të bëhet trajneri i parë që fiton katër trofe të Ligës së Kampionëve, do ta ketë Real Madridin në fuqi të plotë të shtunën. Ai tha se mbrojtësi i krahut të majtë, veterani Marcelo, ka një problem të vogël, por duhet të rikuperohet në kohë për finalen. Qendërmbrojtësi David Alaba, i cili humbi disa ndeshje për shkak të një dëmtimi muskulor, është gati të luajë në finale.
“Formacioni fillestar nuk është me të vërtetë problem, për të qenë i sinqertë”, pranoi Ancelotti. “Nuk është një ndeshje për vetëm 11 lojtarë. Dhe ata që kanë hyrë nga banka e rezervistëve kanë bërë mirë që na kanë ndihmuar deri tani. Gjithçka ka shkuar mirë për ne deri më tani këtë edicion”.
Reali Madridi arriti në finalen e këtij edicioni në Champions pas rikthimit kundër PSG-së në 1/8 e finales, Chelseat në çerekfinale dhe Manchester Cityt në gjysmëfinale.
“Shpresoj që këtë herë Liverpooli të përpiqet të sulmojë kundër nesh”, tha Ancelotti. “Do të jetë një finale argëtuese, shumë e barabartë”.
© KOHA. Të gjitha të drejtat janë të rezervuara.
