Në një sezon kur dhuna në futboll ka bërë një rikthim të shëmtuar, një kërcënim i mundshëm varet mbi finalen e Ligës së Konferencës mes Feyenoordit dhe Romës, që zhvillohet të mërkurën mbrëma në kryeqytetin e Shqipërisë, Tiranë. Deri në 100,000 tifozë pritet të udhëtojnë, pavarësisht se çdo klubi i janë ndarë vetëm 4,000 bileta për finalen inauguruese të turneut evropian të nivelit të tretë, i cili ishte krijuar për t'u dhënë klubeve më të vogla një mundësi në një garë kontinentali. Feyenoordi dhe Roma janë klube të njohura me baza të mëdha tifozësh dhe elementë famëkeq të dhunshëm në mesin e mbështetjes së tyre.
Finalja do të luhet vetëm disa ditë pas një fundjave dhune në ndeshjet që mbuluan një rigjallërim të saj gjatë gjithë sezonit. Përleshjet dhe gazi lotsjellës prishën finalen e Kupës së Greqisë të shtunën, me një lojtar që dyshohet se u godit nga një copë çimento e hedhur nga turma gjatë fitores 1:0 të Panathinaikosit ndaj PAOK-ut. Në Kroaci, policia dhe tifozët e Hajdukut të Splitit u përleshën në një autostradë kryesore më vonë të shtunën. Dhuna përshkallëzoi kur një kolonë prej më shumë se 260 makinash dhe autobusësh po transportonte tifozët e Hajdukut nën shoqërimin e policisë, pasi ekipi i tyre humbi 3:1 ndaj Dinamo Zagrebit. Tifogrupi “Torcida Ultras” ishte përplasur më herët me rivalët nga grupi “Bad Blue Boys” i Zagrebit. Të dielën, Manchester City kërkoi falje për atë që e përshkroi si një sulm ndaj portierit të Aston Villas, Robin Olsen gjatë një pushtimi në fushë nga tifozët e Cityt që festonin titullin e klubit në Premier League.
Diku tjetër, mbështetësit e klubeve italiane Spezia dhe Napoli luftuan me shkopinj në stadium dhe më pas vazhduan në rrugë dhe, në Bosnje dhe Hercegovinë, disa tifozë të ekipit Rudar Prijedor sulmuan lojtarët e tyre pas humbjes 5:2. Dhuna ka përshkallëzuar, ndoshta për shkak të zhgënjimit të lëshuar pas përfundimit të kufizimeve të bllokimit të vendosura gjatë pandemisë COVID-19. Huliganët nga Feyenoordi raportohet se ishin në mesin e atyre që u përleshën rëndë me policinë në Roterdam gjatë një trazire të nëntorit kundër kufizimeve të koronavirusit. Ka pasur pushtime të shumta në fushë dhe përleshje brenda stadiumeve në vende të tilla si Zvicra, Holanda dhe Sllovakia. Shtatorin e kaluar, ndeshja e Ligës së Evropës midis Marseillet dhe Galatasarayt u ndërpre pasi tifozët rivalë hodhën dhe fishekzjarrë ndaj njëri-tjetrit. Tifozët rivalë u përleshën brenda “Stade Velodrome” pas kohës së rregullt dhe mbështetësit e Marseillet më pas u përleshën jashtë me policinë.
Në janar, drejtuesi i policisë në futbollin e Anglisë, Mark Roberts, tha se arrestimet në pesë ligat kryesore angleze ishin më të lartat në vitet e fundit. Një rritje alarmante e pushtimeve në fushë kohët e fundit arriti kulmin me një trajner të Premier Leagues që goditi me shkelm një tifoz, ndërsa ai ishte i shtyrë kur përpiqej të kalonte fushën.
Në shkurt, autoritetet greke premtuan të ashpërsojnë rregullat që rregullojnë shoqatat e mbështetësve pas një sulmi fatal ku përfshihej një 19-vjeçar, i cili u sulmua nga një bandë të rinjsh në Selanik. Dy muaj më vonë, PAOK-u luajti në Marseille, ku mbështetësit vendës u përballën me ultrasit e ekipit grek jashtë hotelit të tyre në prag të ndeshjes. Mbështetësit e PAOK-ut, u përleshën dhunshëm me policinë dhe tifozët rivalë hodhën fishekzjarrë mbi njëri-tjetrin gjatë gjithë ndeshjes.
Më shumë çrregullime pasuan tri javë më parë, kur qindra tifozë të Feyenoordit u përfshinë në përleshje të furishme me homologët e tyre të Marseillet përpara ndeshjes së kthimit gjysmëfinale të Ligës së Konferencës. Mbështetësit e Marseillet, madje lavdëruan Feyenoord në një forum në “Twitter” për mbërritjen pa asnjë mbrojtje policore, dhe një nga grupet e huliganëve të Feyenoordit i përshkroi ngjarjet me humor të shtrembëruar.
“Dy ditë dhe net fantastike në Marseille”, thuhej në postim. “Sulmet mund të priten nga shumë cepa të rrugëve. Një qytet shumë i rekomandueshëm për një ditë të mirë”.
Shumë tifozë të Feyenoordit mbërritën pa bileta në Marseille për ndeshjen e 5 majit, duke e bërë më të vështirë punën e policisë. Ka pasur përplasje në Gjermani po atë natë në gjysmëfinalen e Ligës së Evropës mes tifozëve të Eintracht Frankfurtit dhe West Hamit. Dhuna ndodh shpesh natën para ndeshjeve, kur ka më pak policë përreth, pastaj vazhdon ndërsa vijnë më shumë tifozë. Më 18 maj, pati skena tronditëse në qendrën e qytetit të Sevillas kur Frankfurti u përball me Rangersin skocez.
Disa qindra tifozë të Frankfurtit sulmuan disa dhjetëra mbështetës të Rangersit jashtë një lokali. Sulmi i mbështetësve të Frankfurtit shkeli kodet e shkruara nga vetë ultrasit dhe huliganët, ku tifozët e dhunshëm supozohet se vetëm luftojnë me njëri-tjetrin. Në këtë drejtim, klubet e Romës kanë fituar një reputacion jopopullor. Tifozët jo agresivë janë sulmuar gjatë ndeshjeve mes Romës dhe Lazio, ku disa u goditën me thikë. Ekziston gjithashtu një raport i keq me Feyenoordin pas ngjarjeve në Romë më 2015, kur tifozët e ekipit holandez u përleshën me policinë italiane dhe dëmtuan një shatërvan historik.
Ultrasit e fortë të Romës numërojnë rreth 200 dhe huliganët e Feyenoordit me sa duket i kanë vënë sytë tek ata, me një karikaturë të postuar në një forum të mediave sociale që duket se tregon qëllimin. Vizatimi përshkruante një varkë që zbarkonte në breg me vitin 1908 të shkruar në anën e saj - viti kur u krijua klubi me bazë në Roterdam - dhe me legjionarë romakë të gjakosur e të strukur pas mburojave të tyre. Ultrasit e Romës paralajmëruan shokët e tyre që të sillen mirë në Tiranë duke vendosur nga një shënim në ulëse përpara ndeshjes së fundit të skuadrës në Serie A në shtëpi kundër Venezias.
“Ne kemi një takim me Historinë dhe duhet të jemi të respektueshëm. Udhëtimi drejt Tiranës duhet trajtuar me drejtësi brenda dhe jashtë stadiumit”, thuhej në të.
Tensioneve mes Feyenoordit dhe Romës u shtohet fakti se Tirana ka grupe mbështetëse nga klubet lokale Dinamo dhe Partizani, të cilët potencialisht mund të përkrahin njërën palë ose të dyjat.
Duke pasur parasysh kërcënimin ndaj Ultrasve të Romës, nga Feyenoordi dhe ndoshta grupet e Tiranës, ata mund ta gjejnë veten më të shumtë në numër dhe mund të kenë mbështetje nga Ultras të tjerë. Aleancat midis grupeve Ultras nga vende dhe klube të ndryshme janë shtrënguar. Për shembull, kur West Ham u përplas me Frankfurtin, ata u mbështetën nga disa Ultras të skuadrës së Lazios.
UEFA, organi drejtues i futbollit evropian, Federata Shqiptare e Futbollit dhe autoritetet ligjzbatuese kanë marrë masa paraprake përpara finales të së mërkurës. Brenda stadiumit do të jenë 650 persona për siguri dhe të paktën 2700 policë në Tiranë.
“Ne do të marrim masa për të parandaluar çdo akt dhune apo çdo nxitës dhune në mënyrë që situata të mos degradojë”, tha ministri i Brendshëm i Shqipërisë, Bledi Çuçi. “Ne kemi marrë të gjitha masat për të parandaluar një gjë të tillë”.
© KOHA. Të gjitha të drejtat janë të rezervuara.
