Trajneri i Ballkanit, Ilir Daja, ka thënë se mungesa e posedimit të topit, ka bërë që futbollistët që ai drejton, të pësonin gola.
Tekniku nga Tirana shtoi po ashtu se pati mungesa të rëndësishme në formacion, që e patën ndikimin e vet në këtë lojë.
“Do të thosha se golat që pranuam do të shmangeshin nëse do ta mbanim topin në kontroll sepse kundërshtari pati edhe raste tjera. Arma jonë më e fortë nuk funksionoi. Kjo ishte arsyeja pse shënuam autogol dhe pësuam gola pasi kalonim në avantazh”, tha fillimisht Daja.
Daja më pas e vlerësoi lart lojën dhe skuadrën e Slavia Pragës në tërësi.
“Ne duhet të bëjmë analizë të drejtë. Është një skuadër me buxhet shumë më të lartë në raport me ekipin tonë. Cilësinë e ka shumë më të madhe. Por unë i përgëzoj djemtë për shkak se ndaj një kundërshtari të tillë kemi pasur raste dhe kemi shënuar dy gola. Nëse do të kishim gjithë kontingjentin në dispozicion, do të bënim më mirë. Por, përsëri do të ishte vështirë. Kjo skuadër (Slavia), përveç që luan mirë në aspektin taktik, ka edhe eksperiencën. Ka luajtur edhe në fazën e grupeve të Ligës së Kampionëve”, nënvizoi Daja, i cili sërish ka kërkuar mbështetjen e tifozëve në ndeshjet që Ballkani do t’i luajë në Kosovë, përkatësisht në stadiumin “Fadil Vokrri” në kryeqytet.
“Do të thoja se publiku ishte një motiv më shumë për kundërshtarin sepse 90 minuta ka qenë në mbështetje të tyre. Uroj që me një kundërshtar të fortë në Kosovë të jenë të pranishëm të gjithë sportdashësit, sepse ne po përfaqësojmë edhe Kosovën. Besoj që lojtarët nuk ranë në presion të publikut”, përfundoi Daja.
https://www.koha.net/sport/343868/ballkani-po-kalon-momente-te-mira/
© KOHA. Të gjitha të drejtat janë të rezervuara.
