Ukraina u është bashkuar Spanjës dhe Portugalisë në përpjekjen e tyre për të pritur Kupën e Botës 2030, konfirmuan të mërkurën Federata e Futbollit të Spanjës (RFEF) dhe Federata e Futbollit të Portugalisë (FPF), në atë që ata e quajtën si një akt solidariteti evropian. Dy federatat insistuan se vendimi, i shpallur në një konferencë shtypi në selinë zvicerane të UEFA-s, kishte mbështetjen e plotë të organit drejtues të futbollit evropian dhe gjithashtu të qeverive spanjolle, portugeze dhe asaj ukrainase.
“Oferta jonë nuk është më një ofertë iberike, është një ofertë evropiane” tha Luis Rubiales, president i federatës spanjolle. “Jam i bindur se tani oferta jonë është shumë më e mirë se oferta e mëparshme. Futbolli është universal dhe nëse është i aftë të ndryshojë jetën e njerëzve në kaq shumë mënyra, duhet të përdoret gjithashtu për të bërë mirë”.
Oferta e Spanjës, Portugalisë dhe Ukrainës për turneun e vitit 2030 do të konkurrojë kundër kandidaturave të tjera si një bashkëpunim midis Egjiptit, Greqisë dhe Arabisë Saudite, dhe një propozimi të përbashkët të Amerikës së Jugut nga Uruguai, Argjentina, Paraguai dhe Kili. Rubiales tha se detajet e integrimit të Ukrainës në ofertën spanjollo-portugeze do të përcaktohen në muajt e ardhshëm.
“Ne jemi të bindur se deri në vitin 2030 do të kemi paqe në Evropë dhe se Ukraina do të jetë në gjendje ta presë turneun në mënyrën më të mirë të mundshme”, shtoi presidenti i federatës portugeze, Fernando Soares Gomes da Silva. Kreu i Federatës së Futbollit të Ukrainës, Andriy Pavelko, mori pjesë gjithashtu në konferencën për shtyp të së mërkurës. Pavlenko shprehu mirënjohjen e tij për këtë mundësi. Komisioni Koordinues i Botërorit 2030, i drejtuar nga Antonio Laranjo, tashmë po punon me pjesëmarrjen e Ukrainës, e cila së shpejti do të përfshijë anëtarët e delegacionit të saj. Futja e Ukrainës në këtë ofertë nuk e ndryshon udhërrëfyesin tashmë të vendosur: Spanja ruan njëmbëdhjetë stadiumet e saj dhe Portugalia do të vazhdojë me tre. Forcat ruse pushtuan Ukrainën më 24 shkurt të këtij viti, në operacionin më të madh ushtarak të parë në Evropë që nga Lufta e Dytë Botërore. Dhjetëra mijëra njerëz janë vrarë gjatë shtatë muajve të luftimeve, miliona janë larguar dhe qytetet dhe qytezat janë kthyer në rrënoja. Moska e quan veprimin e saj një “operacion special ushtarak” për të çarmatosur Ukrainën, ndërsa Kievi dhe aleatët e tij perëndimorë thonë se është një rrëmbim i paligjshëm i tokës.
“Kandidatura e përbashkët (Spanjë, Portugali, Ukrainë) forcon lidhjet me Evropën duke gjeneruar shpresë dhe duke ofruar mjete rindërtimi për popullin ukrainas, i cili ka shprehur krenarinë dhe mirënjohjen e tij për pjesëmarrjen në këtë projekt”, thuhej në njoftimin e federatës spanjolle.
Kupa e Botës 2022 do të fillojë më 20 nëntor në Katar, ndërsa turneu i vitit 2026 do të zhvillohet në Shtetet e Bashkuara, Kanada dhe Meksikë.
© KOHA. Të gjitha të drejtat janë të rezervuara.
