Ndeshja Peja – Vëllaznimi e hap xhiron e 11-të të Superligës së Kosovës në basketboll. Kjo ndeshje luhet sonte prej orës 19:00 në palestrën “Karagaçi” në Pejë.
Skuadra pejane udhëheq në tabelë me 17 pikë, përkatësisht me tetë fitore e një humbje. Humbjen e vetme e ka nga Ponte Prizreni. Ndërkohë Vëllaznimi është i gjashti me katër fitore e gjashtë humbje. Por skuadra gjakovare ka shënuar disa fitore të mëdha së fundi dhe synon befasinë në Pejë.
Dy ndeshje tjera të javës së 11-të janë të dielën. Prej orës 17:00 është derbi i madh në mes të Sigal Prishtinës dhe Trepçës.
Ndeshja Rahoveci – Bashkimi luhet nga ora 19:00.
Ndërkohë ndeshja Golden Eagle Ylli – Ponte Prizreni luhet më vonë. Kjo ndeshje është shtyrë me idenë që rezultati të regjistrohet nga Liga Unike. Por ndërkohë Liga Unike u pezullua dhe nuk dihet nëse do të vazhdojë. Për këtë arsye janë shtyrë më herët edhe disa ndeshje të tjera.
