Mbrojtësi i Kosovës, Amir Rrahmani, pritet të jetë një prej mungesave të rëndësishme te skuadra e Napolit për ndeshjen e radhës në Serie A.
Gjasat janë të mëdha që Rrahmani të mos paraqitet fare të dielën kundër Spezias, ndeshje kjo që Napoli e luan në udhëtim prej orës 12:30.
Nëpërmjet një komunikate të enjten, Napoli ka njoftuar se Rrahmani së bashku me Stanislav Lobotkan dhe Piotr Zielinskin nuk kanë stërvitur me pjesën tjetër të ekipit.
Për shkak të lëndimeve të lehta që i kanë pësuar në ndeshjen e fundit, të tre futbollistët kanë stërvitur të diferencuar në palestër. Kështu që, mbetet të shihet nëse Rrahmani do të jetë i gatshëm për ndeshjen kundër Spezias.
28-vjeçari këtë vit është rikthyer nga lëndimi që e mbajti jashtë fushës prej muajit tetor dhe këtë sezon ka regjistruar 13 ndeshje në kampionatin italian ku ka shënuar edhe një gol. Napoli është lider në tabelë me 53 pikë të tubuara pas 20 xhirove të zhvilluara deri më tani.
© KOHA. Të gjitha të drejtat janë të rezervuara.
