Barcelona e pret Sevillan në “Camp Nou”, të dielën nga ora 21:00, në kuadër të xhiros së 20-të të La Ligës.
Barcelona është lidere me 50 pikë, pesë më shumë sesa Real Madridi, kandidati tjetër për titull kampioni. Ka përfunduar pjesa e parë e kampionatit.
Vetëm dy skuadra kanë arritur shifrën e 100 pikëve në historinë e elitës së futbollit spanjoll.
Real Madridi në edicionin 2011-12 dhe Barcelona në sezonin pasues.
Është hera e pestë që Barcelona merr 50 pikë pas pjesës së parë të kampionatit. Në katër raste në fund është shpallur kampione.
Skuadra që drejtohet nga Xavi Hernandez ka treguar sukses edhe në fazën defensive.
Ka pësuar vetëm shtatë gola në gjithë sezonin, ndërsa Jules Kounde dhe Andreas Christensen kanë qenë vendimtarë në këtë ecuri.
Edhe portieri Marc-Andre ter Stegen është kthyer në formën më të mirë të mundshme.
Me shtatë gola të pranuar, Barcelona e ka mbrojtjen më të mirë në pesë ligat më të forta të Evropës.
Sevilla po kalon sezon më të dobët në krahasim me vitet e kaluara.
Por, me ardhjen e trajnerit Jorge Sampaoli, ekipi andaluzian ka shënuar rritje.
Sevilla pozicionohet në vendin e 13-të me 21 pikë. I ka fituar tri nga katër ndeshjet e fundit në ligë.
Xavi mund të ndihet krenar me punën që ka bërë te Barcelona, qëkur mori drejtimin e skuadrës në nëntor të vitit 2021.
Ish-mesfushori e mori Barcelonën në vendin e nëntë në kampionatin e kaluar dhe përfundoi në vendin e dytë, duke u kualifikuar në Ligën e Kampionëve.
Edhe pse u eliminua herët nga kjo garë, Barcelona është përmirësuar dhe ka fituar trofeun e parë që nga ardhja e Xavit.
Barça fitoi Superkupën e Spanjës në muajin janar, duke e mposhtur Real Madridin në finale.
Xavi ka thënë se objektivi kryesor i ekipit është që ta fitojë La Ligan.
Është në rrugë të mirë për ta realizuar këtë sukses.
Por, nëse ekipi i Sampaolit dëshiron që ta vazhdojë ngjitjen në tabelë, duhet ta fitojë ndeshjen e vështirë në udhëtim.
Vedat Muriqi me Mallorcan do të ketë ndeshje të vështirë përballë Real Madridit, të dielën nga ora 14:00.
Real Madridit mund t’i mungojë dyshja Karim Benzema - Eder Militao.
Sulmuesi i Kosovës, Muriqi, ka tetë gola e një asistim në këtë edicion të La Ligas. Ai kishte shënuar ndaj madrilenëve në ndeshjen e kaluar.
Muriqi kishte shënuar në minutën e 35-të për epërsinë e Mallorcas, por skuadra e tij në fund kishte pësuar 4:1.
Mallorca aktualisht pozicionohet në mesin e tabelës me 25 pikë.
© KOHA. Të gjitha të drejtat janë të rezervuara.
