Trajneri francez, Alain Giresse, ka treguar se po e shijon aventurën si selektor i Kosovës. Në një intervistë për sajtin francez “francebleu.fr”, ai ka thënë se Kosova do të jetë plotësisht e gatshme për kualifikimet e Evropianit 2024 që do të mbahet në Gjermani.
Ndeshjet e para kualifikuese zhvillohen në fund të muajit të ardhshëm, ndërsa Kosova bën pjesë në Grupin I së bashku me Zvicrën, Izraelin, Rumaninë, Bjellorusinë dhe Andorrën.
Më 25 mars, Kosova do të luajë në Tel-Aviv ndaj Izraelit, ndërsa tri ditë më vonë e pret Andorrën në stadiumin “Fadil Vokrri” në Prishtinë.
Giresse ka pranuar se grupi nuk është i lehtë, ndonëse ka vlerësuar se ka mundur të jetë edhe më i vështirë. Ai ka shtuar se synohet të paktën vendi i dytë. Dy përfaqësueset e para në grup kualifikohen në Evropianin e vitit të ardhshëm, ndërsa sipas francezit, Zvicra mbetet favorite.
“Grupi mund të ishte më i ndërlikuar. E them këtë sepse do të mund t’i shihnim dy vende shumë të mëdha. Mund të kishim Francën dhe Gjermaninë. Në këtë grup, ka një mundësi. Sinqerisht, ka një mundësi. Zvicra është lart dhe pas saj do të duhet të luftojmë. Nuk them se është e lehtë, po them se është e mundur. Dhe pikërisht me këtë gjendje shpirtërore, duke pasur ambicie, mund të arrijmë diçka me ekipin tonë”, ka thënë Giresse.
70-vjeçari pas dy javësh i bën një vit në krye të Kosovës. Ai insiston se ndihet mirë te Kosova dhe shton se nuk i mungon asgjë. Madje thotë se para se të zgjidhej selektor ka pasur njohuri për Kosovën, kështu që kur iu bë oferta nuk hezitoi fare për ta pranuar.
“Këtë vend e kam njohur që kur isha ftuar për një vizitë dhjetë vjet më parë. Kur isha trajner i Senegalit, kisha propozuar një ndeshje miqësore edhe para se Kosova të anëtarësohej në FIFA. Kështu që ishte kjo lidhje dhe kur më kërkuan të vija unë thashë në rregull”, është shprehur Giresse. “Kemi kushte të mira dhe gjithçka po funksionon mirë. Të gjithë janë në dispozicion për punë. Gjithçka që kërkoj, e kam dhe ju them se lojtarët janë vërtet shumë të vlerësuar në nivel njerëzor dhe shumë respektues për rolin që duhet të kenë me këtë ekip”.
Sipas Giresset, Kosova ka lojtarë cilësorë. Ai përmend kapitenin Amir Rrahmani që luan te Napoli, pastaj Arbër Zenelin e Edon Zhegrovën që bëjnë karrierë në Francë dhe shumë të tjerë që luajnë në Spanjë dhe ligat tjera të Evropës. Giresse thotë se nuk e ka aspak problem ta menaxhojë një ekip të tillë.
“Zhegrova dhe Zeneli bëjnë karrierë në Francë dhe nuk e kam problem ta menaxhoj këtë ekip. Ata u përmbahen kërkesave dhe dëgjojnë. Ka një shpirt të mirë brenda ekipit. Të gjithë janë të shpërndarë nëpër Evropë, asnjëri prej tyre nuk luan në vend. Ka lojtarë si kapiteni ynë që është te Napoli, që ka një dimension të madh për lojën. Ka lojtarë të tjerë që luajnë në Spanjë, ne kemi një nivel krejtësisht korrekt. E përfunduam mirë Ligën e Kombeve. Tani do të hidhemi në këtë betejën e kualifikimeve të Evropianit”, ka thënë Giresse. “Kosova për nga historia e saj dhe pashmangshmërisht historia e ekipit kombëtar, ka vetëm gjashtë vjet që është anëtare e FIFA-s, është krejt e re, pra është një federatë shumë e re që po strukturohet, në kushte pune ku nuk ka asgjë për t'u ankuar. Është e organizuar mirë, çdo gjë është e planifikuar dhe kushtet janë shumë të mira. Dhe lojtarët që janë në një cikël profesional tani duan të mbrojnë vendin e tyre për shkak të historisë së këtij vendi”.
Giresse ka kontratë me Federatën e Futbollit të Kosovës deri në fund të ciklit eliminator të Evropianit 2024, i cili përfundon në fund të muajit nëntor. Ai në kontratë ka të përfshirë edhe opsionin e vazhdimit të bashkëpunimit, varësisht prej suksesit që do ta ketë.
© KOHA. Të gjitha të drejtat janë të rezervuara.
