Një grup prej më shumë se 100 ligjvënësish të Bashkimit Evropian po i kërkojnë Konfederatës Evropiane të Futbollit (UEFA) të mos e lejojë Bjellorusinë të marrë pjesë në kualifikimet për Kampionatin Evropian të vitit 2024.
Eurodeputetët nga i gjithë spektri politik shkruan në një letër dërguar presidentit të UEFA-s, Aleksander Çeferin, se Përfaqësuesja e Bjellorusisë nuk duhet të jetë pjesë e kualifikimeve për shkak të historisë së tmerrshme të të drejtave të njeriut në atë vend.
“Këto nuk janë vetëm vlerat e UEFA-s në pyetje, por edhe reputacioni dhe imazhi i UEFA-s brenda shoqërive demokratike dhe komunitetit ndërkombëtar”, thanë ata.
Javën e kaluar një gjykatë në Bjellorusi dënoi me 15 vjet burg lideren e opozitës në mërgim, Sviatlana Tsikhonouskaya, pas një gjyqi në mungesë për akuza që përfshijnë komplot për përmbysjen e Qeverisë. Është kjo masa e fundit në një përpjekje disamujore të Qeverisë për ta shtypur opozitën.
Presidenti i Bjellorusisë, Aleksander Lukashenko, është aleat i afërt i presidentit rus, Vladimir Putin, në luftën kundër Ukrainës. Rusia përdori territorin bjellorus për të dërguar trupa në Ukrainë më shumë se një vit më parë, në fillim të luftës.
Rusia, e cila tashmë është përjashtuar nga garat e UEFA-s dhe FIFA-s, ka mbajtur trupa dhe armë në Bjellorusi dhe të dy vendet kanë kryer rregullisht stërvitje të përbashkëta si pjesë e aleancës së tyre ushtarake.
Ky qëndrim e la Lukashenkon edhe më të izoluar në Evropë, ku vendi i tij përballet me sanksione nga Bashkimi Evropian si për rolin në luftë, ashtu edhe për shtypjen e opozitës vendase.
Të gjitha skuadrat bjelloruse e kanë të ndalur të organizojnë ndeshjet e tyre si vendase në shtëpi. Duhet të luajnë në terrene neutrale dhe pa tifozë. Por, UEFA vendosi vitin e kaluar të lejojë Bjellorusinë të hyjë në shortin kualifikues për “Euro 2024”, pavarësisht një kërkese të Qeverisë së Gjermanisë, mikpritëse e turneut evropian të futbollit, për të hequr bjellorusët pasi vendi tyre është aleat ushtarak i Rusisë.
“Vetë fakti i pjesëmarrjes së ekipit përfaqësues të Bjellorusisë në Evropian do të përdoret më vonë nga Lukashenko dhe ekipi i tij i propagandës për të dëshmuar se ai është i mirëpritur në komunitetin ndërkombëtar”, shkruanin eurodeputetët në letrën e tyre, të mërkurën.
“Kjo do të ishte një ofendim për viktimat e agresionit rus në Ukrainë dhe për të gjithë bjellorusët që u detyruan të ikin nga atdheu i tyre, si dhe ata që qëndruan në Bjellorusi dhe tani jetojnë në frikë dhe terror”.
Bjellorusia do të nisë fushatën kualifikuese kundër Zvicrës më 25 mars në Serbi, një vendim që ka shkaktuar jo pak shqetësim te zviceranët. Lojtarët me rrënjë nga Kosova, Granit Xhaka dhe Xherdan Shaqiri, mund të përballen me një pritje armiqësore në qytetin e Novi Sadit.
Në grup janë edhe Izraeli, Rumania, Andorra dhe Kosova.
Shumica e sporteve olimpike kanë përjashtuar sportistët nga Rusia dhe Bjellorusia, pasi Putini nisi pushtimin e Ukrainës në shkurt të vitit 2022. Por, skerma dhe xhudo kanë rihapur kohët e fundit dyert për sportistët nga të dy vendet përpara ngjarjeve kualifikuese për Lojërat Olimpike “Parisi 2024”.
© KOHA. Të gjitha të drejtat janë të rezervuara.
