Shqipëria prezanton fanellat e reja, 100% plastikë e reciklueshme
Kombëtarja shqiptare ka prezantuar fanellat e reja që do të shoqërojnë në rrugëtimin e kualifikuesve të Kampionatin Europian “Gjermani 2024”.
Futbollistët do t’i veshin ato të hënën më 27 mars 2023, kur skuadra e drejtuar nga trajneri brazilian Silvinjo do të përballet me Poloninë në ndeshjen e parë kualifikuese të Grupit E.
Kuqezinjët nuk kanë ndryshuar brendin, bashkë me kompaninë “Macron” ata kanë publikuar sot tri versionet e fanellës, e kuqja si fanella e parë, e dyta është e bardha, kurse fanella e tretë mbetet e zeza.
Tri fanellat e reja të kombëtares shqiptare
Elementet në fanella nuk ka ndryshuar shumë, përveç ndryshimit të dizajnit të shqiponjës dykrenare që ka qenë edhe në të kaluarën.
Në pjesën e pasme të qafës, në kornizën e jashtme, është qëndisur “ALBANIA” në ngjyrë të bardhë. Në pjesën e poshtme të fanellës ka një shirit të brendshëm të personalizuar me mbishkrimin e përsëritur “Ti Shqipëri, më jep nder”, një fjali e kthyer në moton e Shqipërisë e marrë nga poezia e Naim Frashërit.
Uniforma e parë plotësohet nga pantallona të shkurtra të zeza dhe çorape të zeza me një vijë të kuqe e të hollë në skajin e sipërm.
“Shqiponja dykrenare, që përfaqëson identitetin e një populli, guximin dhe vlerat e tij, është motivi grafik dominues në fanellat e reja të Kombëtares. I fortë dhe i qartë mesazhi në mbështetje të mjedisit: uniformat janë realizuar tërësisht nga ‘Eco Fabric’, një material i përbërë 100% me plastikë të riciklueshme, duke konfirmuar kështu filozofinë e gjelbër të FSHF-së dhe Macron”, ka shkuar FSHF.
