Franca ka shënuar plot katër gola në përballjen derbi me Holandën, në nisje të kualifikimeve të Evropianit të vitit të ardhshëm.
Finalistja e Botërorit të Katarit vitin e kaluar fitoi ndaj holandezëve me rezultatin 4:0, në ndeshjen e parë të Kylian Mbappes si kapiten i francezëve.
Antoine Griezmann e hapi serinë e golave që në minutën e dytë me asistim të Mbappes.
Griezmanni e zhvilloi ndeshjen e 75-të rresht për Francën, pa munguar në asnjërën prej tyre shkaku i lëndimit apo suspendimit.
Dayot Upamecano dyfishoi epërsinë në minutën e tetë, kurse Mbappe shënoi për 3:0 në minutën e 21-të.
Ishte pikërisht Mbappe ai i cili vulosi rezultatin final të këtij ballafaqimi në minutën e 88-të.
Holandezët me shumë mungesa në këtë përballje, humbën mundësinë të shënonin nga pika e bardhë në minutën e katërt të shtesës, pasi Memphis Depay nuk arriti ta mposhtë portierin Mike Maignan.
Ndeshjen tjetër të Grupit B e fitoi Greqia në udhëtim te Gjibraltari me rezultatin 3:0.
21:35
Franca me epërsi bindëse pas pjesës së parë
Franca e ka mbyllur pjesën e parë me epërsi bindëse ndaj Holandës.
Franca shkoi në pushim mes pjesëve me rezultatin 3:0 pas 45 minutave të para.
Antoine Griezmann, Dayot Upamecano dhe Kylian Mbappe shënuan golat për francezët.
21:15
Mbappe realizon tjetër gol për Francën
Franca është duke e “shkatërruar” Holandën në pjesën e parë. Për 3:0 tani gol ka realizuar Kylian Mbappe.
Mbappe shënoi në minutën e 21-të me asistim të Aurelien Tchouamenit.
