Kosova e ka fituar medaljen e tretë të argjendtë në Grand Slamin e xhudos në Tbilisi të Gjeorgjisë. Pas Distria Krasniqit e Nora Gjakovës, edhe Laura Fazliu ka fituar medalje me shkëlqim argjendi. Laura garoi të shtunën në kategorinë deri 63 kilogramë, ndërsa ka shkëlqyer deri në finale.
Në finale zhvilloi luftë të fortë me bartësen e parë, Lucy Renshall nga Britania e Madhe. Laurës i janë dhënë tri dënime, ndërsa dy të fundit mbeten diskutabile. Për shkak të reagimit pas dënimit të dytë ndaj Laurës, Majlinda Kelmendi është larguar nga gjyqtari nga karriga e trajneres.
Laura ka kërkuar vazhdimisht hedhjet, por sipas gjyqtarit në tatami, përpjekjet e saj nuk ishin të mjaftueshme.
22-vjeçarja megjithatë ka vazhduar me suksese të mëdha dhe po gjen formën optimale në prag të Botërorit. Më 16 shkurt ajo fitoi medaljen e bronztë në Grand Slamin në Tel Aviv.
Me suksesin e së shtunës, Laura ka fituar 700 pikë të rëndësishme në ranglistën botërore.
ishte bartësja e shtatë, ndërsa deri në finale shënoi katër fitore. Mposhti kinezen Tang, francezen Deberdt dhe në çerekfinale kampionen në fuqi të Evropës, britaniken Gemma Howell. Në gjysmëfinale shkëlqeu ndaj australianes Katharina Haecker, të cilën e mposhti me hedhje mjeshtërore pas 25 sekondave. Edhe në finale u paraqit mirë, por megjithatë kthehet me të argjendtën.
Të dielën garon Loriana Kuka, që po ashtu synon medalje. Natyrisht, tri medalje të argjendta është sukses i madh për xhudon kosovare.
© KOHA. Të gjitha të drejtat janë të rezervuara.
