(KD) – Ka bërë bujë mungesa e emrave të disa lojtarëve në listën e përzgjedhësit të Kosovës, Alain Giresse. Disa prej atyre që nuk janë në listë kanë pasur kampanjë të suksesshme e disa kanë luajtur rregullisht te Kosova.
Federata e Futbollit e Kosovës të hënën publikoi listën e selektorit Giresse dhe, me gjithë kërkesat, nuk ka dhënë deri të premten detaje për lojtarët që mungojnë në listë. Vetëm të premten selektori Giresse ka mbajtur konferencë për shtyp dhe ka treguar më shumë për mungesat. Në listën e selektorit Giresse janë 23 lojtarë. Pjesë e saj nuk ishin Arbër Zeneli, Florent Hadërgjonaj, Zymer Bytyqi, Valon Berisha, Arbnor Muja, Mirlind Daku e disa të tjerë. Por emrat e këtyre lojtarëve janë përfolur më së shumti. Ndërkohë në listë janë disa lojtarë që nuk kanë luajtur gjatë për skuadrat e tyre apo që kanë luajtur fare pak.
Në konferencën e së premtes Giresse ka folur për lojtarët që nuk janë në listë.
Florent Hadërgjonaj luan rregullisht për Kosovën dhe në Superligën e Turqisë, por me gjasë nuk ka shfaqur shumë interes të jetë në përfaqësuese. Edhe më herët ka pasur raste kur Hadërgjonaj nuk i është përgjigjur ftesës.
“Sa i përket Florentit, ka të bëjë me arsye personale që ai nuk ka mundur të jetë pjesë e grumbullimit. Te Valon Berisha kam bërë zgjedhje sportive dhe ky është vendimi im. Te Zeneli e Bytyqi ka të bëjë me minutazhën e vogël që e kanë pasur në klubet e tyre, andaj në aspektin moral dhe fizik nuk mendoj se ata ishin të gatshëm për t’u grumbulluar. Madje me Zenelin kam diskutuar për këtë çështje”, u shpreh Giresse.
Zeneli ka luajtur pak për Reimsin në elitën franceze, por edhe më pak kanë luajtur disa lojtarë që janë në listë. Zeneli për KOHËN ka konfirmuar se ka pasur bisedë me selektorin dhe se janë pajtuar që mos të grumbullohet si rrjedhojë e paraqitjeve jo të bollshme te Reimsi.
Ndërkohë Zymer Bytyqi nuk ka qenë fare në planet e Olympiacosit. Valon Berisha ka luajtur rregullisht, por në Australi.
“Edhe Mirlind Daku është zgjedhje sportive për disa arsye. Pastaj në repartin e sulmit kemi shumë lojtarë edhe pse jam i vetëdijshëm se ai po luan mirë”, ka vazhduar Giresse.
Në sulmin e Kosovës i padiskutueshëm është Vedat Muriqi. Daku luan në kampionatin slloven, ku ka shënuar numër të madh golave. Por La Liga e Muriqit është nivel shumë herë më i lartë.
Sa i përket sulmuesit të krahut, Arbnor Muja, i cili ka fituar titullin e kampionit dhe kupën me Antwerpin në Belgjikë, Giresse dha versionin e tij. Selektori tha se Muja kishte kërkuar garanci për të qenë titullar.
“Sa i përket Mujës, e kam ftuar për miqësoret që i kemi pasur në nëntor por nuk ka ardhur. Pastaj e kam ftuar për ndeshjet e muajit mars dhe ishte pjesë e ekipit. Sa u përket këtyre ndeshjeve, Muja ka kërkuar garanci për vendin e titullarit gjë që i kam shpjeguar se askush nuk e ka të garantuar një gjë të tillë. Dhe, nëse mendon kështu atëherë është më mirë mos të vijë sesa të vijë e të mos luajë”.
Pak orë pas konferencës, Muja reagoi përmes një postimi në rrjete sociale. Mohoi të ketë kërkuar garanci se do të luajë, por pranoi se ka shprehur pakënaqësi që nuk ka luajtur në ndeshjet e marsit. Shkroi se deklarata e Giresset është e pavërtetë dhe se emrin e tij selektori nuk mund ta njollosë.
“Me selektorin Giresse dhe ndihmësin e tij kam biseduar gjatë pjesëmarrjes sime në ndeshjet e marsit. Kërkesa ime ka qenë për të ditur se ku qëndroi në planet e selektorit Giresse për ndeshjet e ardhshme dhe pse nuk jam paraqitur ndaj Izraelit dhe Andorrës. I kam treguar që mendoj se ka qenë e padrejtë mosprezenca ime në ndeshjet e marsit”, ka shkruar Arbnor Muja.
Në konferencë Giresse ka folur për formën e mirë të disa lojtarëve dhe sukseset që i kanë pasur me skuadrat e tyre. Ka përmendur titujt e Amir Rrahmanit në Itali, Milot Rashicës në Turqi, Donat Rrudhanit në Zvicër dhe 15 golat e Vedat Muriqit te Mallorca.
Por nuk ka përmendur lojtarët si Amar Gërxhaliu, Bersant Celina, Mirlind Kryeziu, Betim Fazliji, Samir Ujkani, që janë në listë e kanë luajtur fare pak në nivel klubesh.
Për temën e lojtarëve ka folur edhe menaxheri i përfaqësueses, Bajram Shala. Ai ka përmendur edhe “shantazhin”.
Shala është pyetur në lidhje me raportimet se Arbnor Muja do t’i bashkohet Shqipërisë.
“Situata e Mujës është shumë e thjeshtë dhe spekulime janë të gjitha ato lajme se do të shkojë te Shqipëria. Ai është dhe mbetet futbollist i Kosovës. Kjo është temë e mbyllur dhe ai mbetet pjesë e ekipit”, është shprehur Shala. “Më shqetësuese se kjo është një lloj trendi që vazhdimisht ka qenë vitet e fundit, ndoshta që nuk vjen nga futbollistët por agjentët e tyre, duke bërë shantazh që sa herë nuk ftohet një lojtar atëherë flitet se do të shkojë te Shqipëria. Por, te ne kjo temë nuk diskutohet dhe duam t’ua bëjmë me dije të gjithëve se nuk pranojmë shantazhe të tilla. Nëse ata nuk ftohen nga trajneri për shkak të vendimeve të tij, atëherë nuk mund të gjejnë forma të tilla për të shantazhuar Kosovën, duke kaluar te përfaqësueset e tjera. Kemi pasur raste të tilla edhe që janë larguar, por ata që duan të largohen janë të lirë të bëjnë një veprim të tillë”.
Lista e lojtarëve të Kosovës vazhdimisht diskutohet shumë. Edhe në të kaluarën ka pasur raste kur lojtarët i janë përgjigjur negativisht ftesës e po ashtu që kanë kushtëzuar ardhjen me paraqitje. Por rastet e tilla janë kaluar disi në heshtje dhe pa ndonjë veprim apo masë konkrete.
© KOHA. Të gjitha të drejtat janë të rezervuara.
