Licenca e Federatës së Karatesë së Kosovës është pezulluar të hënën nga ministri i Kulturës, Rinisë dhe Sportit, Hajrulla Çeku. Kështu vetëm është konfirmuar kriza e madhe në sportin e karatesë, përkatësisht ndarja e komunitetit të karatesë në dy grupe. Në zhvillimet negative rreth karatesë është përfshirë edhe Komiteti Olimpik i Kosovës.
MKRS-ja ka njoftuar se ministri Çeku ka aprovuar propozimin e Komisionit Vlerësues për Licencimin e Federatave Sportive për pezullim të licencës të Federatës së karatesë. Sipas vendimit, veprimet e Federatës së Karatesë janë në kundërshtim me Ligjin për sport, Udhëzimin Administrativ për kushtet, kriteret dhe procedurat e themelimit, licencimit dhe rivlerësimit të federatave, si dhe Statutin e FKK-së.
“Bazuar në shkeljet e evidentuara, KVLFS ka rekomanduar pezullimin e licencës së FKK-së, e cila obligohet që brenda 45 ditëve të organizojë përsëritje të Kuvendit të Jashtëzakonshëm”, shkruan në njoftimin e MKRS-së.
Në kuvend mund të marrin pjesë vetëm përfaqësuesit e klubeve që janë licencuar. Në rast se Federata nuk e respekton Ligjin, atëherë MKRS-ja ka kërcënuar se do t’ia tërheqë plotësisht licencën. Licenca është bazike për funksionimin e një federate sportive.
Ka disa muaj që ka përplasje të mëdha në “familjen” kosovare të karatesë. Një grup mbajti një kuvend të jashtëzakonshëm, që shpalli drejtues të rinj të Federatës. Por përfaqësuesit e MKRS-së që monitoruan atë kuvend të jashtëzakonshëm gjetën shkelje të ndryshme. Ndër të tjera, kryetari i zgjedhur në atë kuvend, Besart Baruti, nuk kishte bazë deleguese nga asnjë klub i licencuar.
Ndërkohë Komiteti Olimpik i Kosovës ka pranuar atë kuvend si të rregullt dhe kryetari i KOK-ut, Ismet Krasniqi, ka nisur letër në Federatën Botërore të Karatesë për ta njoftuar për “strukturën e re të Federatës së Karatesë”. Një letër të ngjashme e ka nisur edhe sekretari i përgjithshëm i KOK-ut, Besim Aliti. Letrat e Ismet Krasniqit e të Besim Alitit i ka bërë publike Avni Gashi, që përfaqëson njërin grup. Avni Gashi e vlerëson veten kryetar të FKK-së.
“Pas tre muajsh nga tentimi për puç në Federatën e Karatesë së Kosovës, përfundimisht faktohen shkeljet ligjore dhe statutare nga një grup i vogël, për interesa të ngushta dhe i përkrahur nga KOK-u, siç shihet edhe në dokumentet e bashkangjitura. Fatkeqësisht karateja po dëmtohet. Të gjithë bashkë do ta ngritim karatenë aty ku i takon”, ka shkruar Avni Gashi në një postim të hënën.
Ndërkohë KOK-u tashmë bashkëpunon me grupin tjetër, që pos nga Baruti përfaqësohet edhe nga Nazmi Gashi, sekretar i përgjithshëm i FKK-së. Ai vlerësohet shumë i afërt me drejtuesit e KOK-ut. Nazmi Gashi po merr pjesë në Lojërat Mesdhetare në Rërë në Heraklion të Greqisë. Delegacionin për këtë ngjarje e ka caktuar KOK-ut. Madje Nazmi Gashi është parë edhe në takim me kryeministrin Albin Kurti dhe me drejtues të tjerë shtetërorë. Në Heraklion ka udhëtuar edhe Baruti. Të dy, ndër të tjera, kanë bërë fotografi me kryeministrin Kurti dhe drejtuesit e KOK-ut.
Përplasjet në karate pritet të vazhdojnë. Dhe si gjithnjë çmimin e paguajnë sportistët.
© KOHA. Të gjitha të drejtat janë të rezervuara.
