Një karateist nga Kosova fitoi medalje të artë në Lojërat Evropiane. Ndërkohë karateja kosovare po shkon drejt pikës ndoshta më të ulët të saj deri më tani. Akuzat mes dy grupeve sa shkojnë e rriten, ndërsa pezullimi i licencës së Federatës të Karatesë së Kosovës nga Ministria e Kulturës, Rinisë dhe Sportit me shumë gjasë nuk do të jetë masa e vetme.
Ka disa javë që komuniteti jo shumë i madh i karatesë kosovare është ndarë në dy grupe. Njërin grup e përfaqëson Avni Gashi, që veten e konsideron kryetar të FKK-së. Grupi tjetër përfaqësohet nga sekretari i përgjithshëm, Nazmi Gashi, dhe nga Besart Baruti, që ky grup e konsideron kryetar.
Ndarja sa shkon e thellohet dhe tashmë akuzat për keqpërdorime, blerje votash e favore jo të ligjshme janë thuajse të përditshme.
Situata është dramatizuar në prag të Kampionatit Ballkanik të Karatesë që prej 22 deri më 24 shtator mbahet në Tiranë.
“’Mos ushtro hiq, veç shko deri në Durrës dhe bëje një fotografi me grupin’. Kërkesa e fundit për garues nga manipuluesit e karatesë”, është njëri prej postimeve të fundit të Avni Gashit.
Ai ka bërë akuza publike për grupin tjetër për tentim të blerjes së votave dhe për joshje përmes pozitave, parave, kontratave për sponsorim, dërgimin e karateistëve në gara, dërgimin e trajnerëve në gara...
Avni Gashi ka akuzuar, po ashtu, grupin tjetër për ndëshkim të garuesve elitarë. Ka prezantuar edhe një email që Nazmi Gashi, të cilit Avni Gashi i referohet si ish-sekretar, e ka dërguar në klubet e karatesë.
Në atë email është paraqitur një listë e katër karateistëve, që pretendohet se kanë “injoruar institucionin e selektorit” dhe se për këtë shpenzimet për pjesëmarrje në Kampionat Ballkanik do t’i paguajnë vetë. Është paraqitur edhe lista e shpenzimeve që ata duhet t’i mbulojnë e që për person është 195 euro, ku përfshihet paraqitja në garë dhe akomodimi.
Grupi i Nazmi Gashit e ka nën kontroll qasjen në sistemin “Sportdata” përmes të cilit bëhet regjistrimi i garuesve për gara ndërkombëtare.
Avni Gashi ka akuzuar direkt edhe Komitetin Olimpik të Kosovës për përfshirje. Ka publikuar dy emaile që drejtuesit e KOK-ut, kryetari Ismet Krasniqi dhe sekretari i përgjithshëm, Besim Aliti, kanë dërguar në asociacionet ndërkombëtare për të legjitimuar ndryshimet në Federatë, që sipas Avni Gashit, por edhe interpretimit të MKRS-së, nuk janë të ligjshme.
Ndërkohë, karateistë kosovarë të dielën kanë përfunduar një kamp në Durrës. Kampi është organizuar nga grupi që drejtohet nga Baruti dhe Nazmi Gashi. Kjo dyshe ka afërsi me drejtuesit e KOK-ut dhe ishte prezentë edhe në Lojërat Mesdhetare në Rërë që përfunduan këtë fundjavë në Heraklion të Greqisë. Janë publikuar shumë fotografi të drejtuesve të KOK-ut me drejtues të këtij krahu të karatesë kosovare.
Nazmi Gashi ka kundërshtuar akuzat e grupit të Avni Gashit. Madje ai e vlerëson të padrejtë edhe vendimin e MKRS-së për të pezulluar licencën e Federatës së Karatesë së Kosovës. Ministria ka kërkuar Kuvend të ri të Federatës së Karatesë dhe pjesëmarrjen në të vetëm të klubeve që janë të licencuara nga MKRS-ja.
Nazmi Gashi thotë se vendimi i MKRS-së për pezullim të licencës është dërguar në Këshillin e Arbitrazhit Sportiv të KOK-ut.
“Vendimi i MKRS-së është arbitrar dhe në kundërshtim me Statutin e FKK-së. Kushtetuta jonë është Statuti dhe kërkojmë nga MKRS-ja të na tregojë se në cilat pika janë shkelur ligjet. FKK-ja ka mbajtur Kuvendin Zgjedhor më 4 korrik dhe ka një kryetar dhe një udhëheqësi, prandaj ato që ish-kryetari del dhe i thotë janë shpifje dhe nuk kanë kurrfarë baze. Janë akuza për të krijuar mjegull, sepse FKK-ja tashmë i ka organet e saj. Në FKK kanë të drejtë vote klube të regjistruara e jo të licencuara nga MKRS-ja. Prandaj e shohim si ndërhyrje nga MKRS-ja dhe për këtë kemi kërkuar nga KAS sqarim se kujt i takon e drejta për të thirrur kuvend dhe e drejta e votës për ta sqaruar edhe opinionin nga kjo mjegull e krijuar pa nevojë nga MKRS-ja”, ka thënë Nazmi Gashi për KOHËN. Ai i është përgjigjur një akuze të bërë nga Avni Gashi.
“Pretendimet se kemi harxhuar para për darka, nuk qëndron. Ato para janë shpenzuar për organizim të kuvendeve dhe seminareve sa ai ka qenë kryetar, është borxh i ish-kryetarit. Presim nga ministri ta rishqyrtojë vendimin pas opinionit që do të merret nga KAS-i”, ka shtuar Nazmi Gashi.
Ndarje në komunitetin e karatesë ka pasur edhe më herët. Dhe ato patën ndikim që Alvin Karaqi e disa të tjerë të kalonin te Shqipëria. Karaqi e fitoi për Shqipërinë medaljen e artë në Lojëra Evropiane, derisa karateistët që garojnë për Kosovën nuk e patën të drejtën e paraqitjes në këtë ngjarje.
Më herët FKK-në e ka drejtuar Ismet Krasniqi, që tani udhëheq Komitetin Olimpik të Kosovës. Përfshirja e MKRS-së e po ashtu e KOK-ut u ka dhënë dimension tjetër zhvillimeve në “familjen” kosovare të karatesë. Të goditur në fund nga zhvillimet jashtë arenës do të jenë pikërisht karateistët. Kjo tashmë është konfirmuar e rikonfirmuar nga ndarjet që kanë ndodhur në federatat e tjera sportive.
© KOHA. Të gjitha të drejtat janë të rezervuara.
