“Nora Gjakova po e kthen shkëlqimin”.
Ky është përkufizimi që trajneri Driton Kuka i bën paraqitjes së kampiones olimpike, të premten, në Grand Slamin e xhudos, në Baku të Azerbajxhanit. Nora ka “shkelur” rivalet në kategorinë deri 57 kilogramë dhe ka fituar medaljen e artë.
Ishte e arta e parë e xhudistes pejane që nga Lojërat Olimpike “Tokio 2020” të mbajtura në verën e vitit 2021.
Shkëlqimi i Norës po kthehet në momentin më të duhur, në fazën e rëndësishme përgatitore për Lojërat e ardhshme Olimpike, ato “Parisi 2024”.
Paraqitja e Norës në tatami e mbush me optimizëm trajnerin Driton Kuka, që nuk është me ekipin në Azerbajxhan. Ajo rreshtoi katër fitore me Ippon, tri prej tyre falë zhdërvjelltësisë dhe nivelit të lartë në luftën në dysheme, për të arritur në finale. Në finale me gjeorgjianen Eteri Liparteliani ishte plotësisht dominuese. Nuk u rrezikua asnjëherë, ndërsa nivelin fizik e kishte superior. Nuk realizoi “Ippon”, por shënoi fitore komode me uazari. Ndaj Lipartelianit, Nora tani ka pesë fitore. Nuk ka pësuar ndonjë disfatë.
“Nora po e kthen shkëlqimin. Për paraqitjen e saj nuk kam fjalë. E sigurt, efikase, pothuajse pa gabime. Do të doja shumë që këso paraqitje të ketë në Lojëra Olimpike”, ka thënë Driton Kuka për KOHËN.
Pikërisht nga Lojërat Olimpike, Nora nuk ka shfaqur sigurinë që e kishte të premten në Baku.
“Nora sot ka dhënë sinjal interesant, sinjal që po i kthen sigurinë e stabilitetin”, ka shtuar Kuka.
Se Nora ka nivel të lartë, janë të vetëdijshëm edhe përgjegjësit në Federatën Ndërkombëtare të Xhudos.
“Gjakova është e fortë dhe e dëshmon këtë”, është titulli i shkrimit të IJF-së për garën në kategorinë deri 57 kilogramë.
IJF-ja ka shkruar se Liparteliani është dominuar që nga fillimi nga Nora. Nora nuk ka lejuar kundërshtaren që t’i afrohet. Pasi ka realizuar pikë, ka kontrolluar luftën pa telashe deri në fund.
“Kosova tashmë ka dy medalje, një të artë e një të argjendtë. Kjo është gjithmonë e jashtëzakonshme, por nuk është më befasi. Krasniqi dhe Gjakova janë tashmë në gjendje të mbrojnë titujt e tyre olimpikë të fituar në Tokio në vitin 2021”, ka shkruar IJF-ja.
Distria fitoi medaljen e argjendtë në kategorinë deri 52 kg. Ajo shfaqi stabilitet deri në finale, ku u dominua nga një japoneze ende jo shumë e njohur.
Kosova ka edhe tri adute për medalje në Baku, të shtunën. Por gara tashmë është shumë e suksesshme.
Nga një medalje të artë e një të argjendtë të premten i kishin edhe Azerbajxhani dhe Japonia. Por asnjë vend nuk e kishte suksesin e Kosovës – dy garuese, dy medalje.
© KOHA. Të gjitha të drejtat janë të rezervuara.
