Rënie masive e Bitcoinit, prek vlerën më të ulët në 18 muaj
Kriptovalutat kanë pësuar tjetër rënie të madhe në vlerë. Bitcoini, si valuta më e madhe, ka përjetuar rënie duke prekur shifrat më të ulëta në 18 muaj.
Një njësi Bitcoin ka vlerën e 20 mijë e 300 dollarëve, që paraqet vlerën më të ulët që nga dhjetor i vitit 2020. Që nga e premtja ka humbur rreth 30 për qind të vlerës. Sivjet ka humbur më shumë se gjysmën e vlerës.
Që nga rritja rekorde në nëntor, kur preku vlerën 69 mijë dollarë, BTC-ja ka rënë për rreth 70 për qind.
Edhe kriptovalutat tjera kanë pësuar rënie. Etherumi, si valuta e dytë më e madhe, të mërkurën ka prekur shifrën 1017 dollarë, si vlera më e ulët në 15 muaj.
Rënia e madhe ka ndodhur në prag të vendimit të Shteteve të Bashkuara për të rritur normat e interesit.
