Duke filluar nga e mërkura e 1 shkurtit [sot], përdoruesit që krijojnë përmbajtje për YouTube Shorts kanë mundësinë të fitojnë para.
YouTube u ka premtuar krijuesve 45 për qind të të ardhurave të krijuara nga shikimet dhe kjo nismë financiare mund ta bëjë YouTube Shortsin rivalin më të madh të TikTokut.
Në TikTok, edhe krijuesit më të mëdhenj kanë shumë pak fitim përmes programit të ndarjes së të ardhurave nga reklamat. Në këtë mënyrë, YouTube Shorts po përpiqet të tërheqë përdorues sa më shumë.
Platforma ka parë rritje të vazhdueshme dhe ka regjistruar 1.5 miliardë shikues në muaj, ndërsa TikToku pati rritje enorme në vitin 2022.
Tani YouTube po u ofron krijuesve mundësinë për të fituar para nga përmbajtja e tyre përmes Programit të Partnerëve në YouTube, që do të thotë se platforma do të ndajë një pjesë të të ardhurave që ata gjenerojnë nga Shorts.
Kërkesa për fitimin e parave është që kanali i krijuesit ose i reklamuesit të ketë të paktën 1000 abonentë ose 4000 orë shikimi në 12 muajt e fundit ose 10 milionë shikime publike të Shorts në 90 ditët e fundit.
© KOHA. Të gjitha të drejtat janë të rezervuara.
