Ferid Agani, ish-ministër i Shëndetësisë në emisionin “Tempus” në KTV, ka thënë se aktakuza ndaj tij në rastin “Stenta” ishte e pabazuar dhe absolutisht e panevojshme.
Sipas tij, që në intervistimin e parë nga prokurori Besim Kelmendi, e kishte theksuar se gabimisht po i referohen Ligjit të Prokurimit Publik, ngase mjetet financiare në kategorinë e subvencioneve menaxhohen në bazë të Ligjit për Financa Publike.
“Qysh në intervistën e parë me Kelmendin, unë e kam vërejtur një anomali të insistimit të prokurorit në një shkresë që kishte ardhur nga Komisioni Rregullativ i Prokurimit Publik, i cili iu kishte përgjigj Prokurorisë, në të cilin thuhej se buxheti i Ministrisë së Shëndetësisë duhet të shfrytëzohet në pajtim me Ligjin e Prokurimit Publik ose në pajtim me ligjet tjera që rregullojnë fusha të caktuara. Dhe Kelmendi insistonte se në mënyrën si janë shfrytëzuar mjetet në kategorinë buxhetore të subvencioneve të MSh-së, të dedikuara për këtë qëllim është shkelë Ligji i Prokurimit Publik. Unë që në fillim thash e keni gabim, ju kisha lut qartësojeni këtë çështje sepse nuk bëhet fjalë për Ligjin e Prokurimit Publik, mjetet financiare në kategorinë e subvencioneve menaxhohen në bazë të Ligjit për Financa Publike, më konkretisht, rregullores 01/13 të Ministrisë së Financave”, ka thënë Agani të martën.
Agani ka shtuar se kishte insistuar që të sqarohet kjo çështje, në mënyrë që të mos iniciohen procedura që janë në pajtim me ligjin dhe të cilat mund të kenë rekrusione për të dhe reformën në MSh.
Tutje, ai ka theksuar se më pastaj u zhvendos nga Ministria e Shëndetësisë në Ministrinë e Mjedisit dhe Planifikimit Hapësinor dhe pas 1 vit e gjysmë të ushtrimit të detyrës atje, i erdhi ftesa për intervistën e tretë në Prokurori.
“Unë e pash që kjo çështje po bëhej serioze dhe nuk do të përfundojë si duhej. Unë insistova prapë te Kelmendi që kjo çështje të qartësohet në KRrPP, prapë ishte përgjigja e njëjtë, ‘nuk ka nevojë, nuk ka nevojë që kjo të bëhet’ dhe me thënë të drejtën isha i befasuar. Natyrisht, u ngrit aktakuza, ishte tërësisht e pabazuar, ishte absolut e panevojshme, ishte aktakuzë e cila i referohej ligjit të gabueshëm, kinse është shkel ligji i gabueshëm dhe e kam thënë në ditën e parë të gjykimit dhe kjo u referua pas 6 vitesh në gjykimin e dytë pranë trupit gjykues të Gjykatës Themelore në Prishtinë”, ka deklaruar Agani.
Pas një procesi maratonik gjyqësor, ish-ministri Ferid Agani, gushtin e sivjetmë u shpall i pafajshëm nga Gjykata Themelore në Prishtinë, pas akuzave për korrupsion, në rastin e njohur si “Stenta 1”.
© KOHA. Të gjitha të drejtat janë të rezervuara.
