Pas 16 ditësh gara interesante e emocionale, Lojërat Olimpike të Tokios u mbyllën të dielën me një ceremoni të bukur.
U prit një vit për të parë një rekord prej 339 medaljesh të arta, të ndara në Lojërat e mbajtura në kryeqendrën e Japonisë.
Në fakt, ishte pandemia e koronavirusit që detyrimisht shtyu Lojërat Olimpike, që ishin planifikuar të mbaheshin vitin e shkuar. Pos arritjeve të shkëlqyera sportive, pati gjithashtu shumë momente interesante që ngrohën zemrën e tifozëve, të cilët këtë ngjarje multisportive e përcollën nga televizori për shkak se nuk u lejuan në arena shkaku i koronavirusit.
Nga sportiviteti i vërtetë te ribashkimet emocionale kishte shumë momente të bukura në Lojërat e Tokios.
Më poshtë rikujtojmë dhjetë momentet më emocionuese të Lojërave Olimpike të përfunduara të dielën.
Së pari shoqe, pastaj rivale
Misugu Okamoto e Japonisë u kualifikua në finalen e garave të skateboardit, sport ky që debutoi në Tokio. Okamoto e kishte rezultatin më të lartë.
15-vjeçarja, numër një në botë, ishte e fundit që garoi në finale, por kishte dhimbje kur ra nga skateboardi, pasi u përpoq të rrokullisej në tentimin e saj të fundit. Shkaku i kësaj Okamoto zuri vendin e katërt në renditje, që do të thoshte se britanikja Sky Brown e siguroi medaljen e bronztë në Lojërat Olimpike. Ndërsa Okamoto u shtri përtokë me lot, shoqet e saj finaliste, të cilat kishin një moshë mesatare deri 17 vjet, nxituan për ta ngushëlluar, duke e ngritur mbi supet e tyre dhe duke e hedhur në ajër. Ky ishte një ndër veprimet më sportive të Olimpiadës së Tokios.
Daley merr të artën e tij
Më në fund Tom Daley i dha fund pritjes së tij të gjatë për medalje të artë olimpike në kërcimet në ujë. Me performancën e tij të shkëlqyer së bashku me Matty Lee në 10 metra sinkronizim, Daley e siguroi të artën.
Daley ka jetuar pjesën më të madhe të jetës së tij në sy të publikut, pasi bëri debutimin e tij olimpik në vitin 2008, në moshën 13-vjeçare. Gjashtëmbëdhjetë vjet më vonë ëndrra e tij u bë realitet përfundimisht dhe ai u kurorëzua kampion olimpik. Reagimi i tij pasi e fitoi të artën olimpike i tregoi të gjitha.
Jo një, por dy
Pse të jetë vetëm një kampion olimpik, kur mund të jenë dy?
Pas një finaleje rraskapitëse që zgjati dy orë, në kërcim së larti në konkurrencën e meshkujve, Mutaz Barshim i Katarit dhe Gianmarco Tamberi i Italisë nuk mund të ndaheshin, pasi kishin regjistruar rezultatin më të mirë - 2.37 metra.
Atyre iu ofrua një mundësi për të kërcyer edhe nga një herë për të vendosur për medaljen e artë. Mirëpo të dy në fund vendosën që ta ndanin medaljen e artë. Ky ishte rasti i parë kur dy atletë u ngjitën në podium për ta marrë medaljen e artë. Festimet e tyre dhe imazhi duke e ndarë të njëjtin podium do të jetë portreti i Lojërave Olimpike të Tokios.
Festa në kopsht
Një kopsht i pasmë në Maidenhead ishte vendi për të qenë për finalen e stilit të lirë në 200 metra në konkurrencën e meshkujve.
Pa asnjë familjar ose miq të lejuar për të udhëtuar në Tokio për të parë të dashurit e tyre, mamaja e notarit Tom Dean kishte një plan B. Megjithëse djali i saj hyri në garë si autsajder, Jackie Hughes nuk e humbi shansin për ta bërë një rast të veçantë debutimin olimpik. Dhe ajo bëri një punë të mirë. E vendosur për të mos i mërzitur fqinjët, ajo i ftoi ata të shikonin garën së bashku me rreth 70 anëtarë nga familja e Dean, ish-trajnerë dhe miq, ndërsa ai fitoi medaljen e artë përpara shokut të skuadrës, Duncan Scott. E festa e familjes së tij në Angli nuk është çudi që u bë virale në gjithë botën.
Mbretëresha e rikthimit
Olimpiada ka të bëjë me shikimin e sportistëve më të mirë në botë, që shkojnë kokë më kokë në skenën globale. Pra, ishte një befasi e vërtetë që gjimnastja amerikane Simone Biles u tërhoq nga garat ekipore dhe finalja individuale për shkak të shëndetit mental. Kampionia e katërfishtë olimpike u rikthye në ditën e fundit të garave të gjimnastikës artistike në Tokio dhe u kthye me stil për të fituar një vend në podium.
Pa medalje në BMX, pastaj dy përnjëherë
Ekipi i Britanisë nuk kishte fituar kurrë medalje olimpike në garat e çiklizmit BMX, por Kye Whyte dhe Bethany Shriever siguruan dy brenda pak minutave. Medalja e argjendtë e Whyte në konkurrencën e meshkujve erdhi e para, përpara se Shriever të ndalonte kampionen e dyfishtë Mariana Pajon për të fituar garën e saj. Shriever, të cilës i duhej financimi i shumtë për të qenë në gjendje të shkonte në Japoni, u ngrit në ajër nga Whyte ndërsa çifti festoi arritjet historike.
Bëhuni më Rubin
Biseda e Jill Douglait pas ndeshjes me yllin e ragbit të Zelandës së Re, Ruby Tui do të mbetet si një nga intervistat më të mëdha të Lojërave Olimpike “Tokio 2020”. Ruby fitoi zemrat e të gjithëve në Olimpiadë pasi ishte më meritorja për fitoren e Zelandës së Re ndaj ekipit të Komitetit Olimpik Të Rusisë në çerekfinale. Pas kësaj, Ruby ndihmoi vendin e saj për ta fituar edhe medaljen e artë.
Një familje, tre olimpistë
Galal Yafai fitoi medaljen e parë të artë për ekipin britanik në boks. Kampioni i ri olimpik në peshën e lehtë është vëllai më i vogël i boksierëve Kal dhe Gamal, të cilët garuan në Lojërat Olimpike të vitit 2008 para se të bëheshin profesionistë. Pasi mori medaljen e tij të artë në podium, emocionet u rritën kur Galal u ribashkua me Kalin në telefon, drejtpërdrejt në BBC. Pyetja e parë e Galalit drejtuar vëllait të tij? “Si boksova?”
Rekordi mahnitës i Schoenmaker
Ishte një moment brilant në “Tokyo Aquatics Center” kur Tatjana Schoenmaker e Afrikës së Jugut kuptoi se e kishte fituar medaljen e artë dhe kishte thyer rekordin botëror në 200 metra not në stilin bretkosë. Schoenmaker shpërtheu në lot, pasi rekordi që qëndroi për tetë vjet u thye më në fund. Bashkatdhetarja e Schoenmakeriy, Kaylene Corbett, plus Lilly King e SHBA-së dhe Annie Lazor, nxituan ta uronin atë dhe qëndruan të përqafuara në pishinë derisa lajmi u përhap.
Ribashkimet
Shumë sportistë kanë thënë se gjëja më e vështirë për “Tokio 2020” ishte të qenit larg nga të dashurit e tyre. Për sa u përket arritjeve të tyre në Tokio, gjimnasti Max Whitlock dhe varkëtarja Helen Glover kishin përvojë të kundërt. Ata janë çift.
Ndërsa Whitlock mbrojti me sukses titullin e tij, Glover e humbi medaljen me vetëm 0.01 sekonda në garat e çifteve. Por për dyshen britanike javët larg shtëpisë ia kanë vlejtur për këtë ribashkim.
