Vështrime

Franca është e bindur se e ardhmja e Kosovës është evropiane

Franca mbetet e përkushtuar, e bashkuar dhe solidare me partnerët e saj evropianë dhe ndërkombëtarë të prekur nga kriza shëndetësore

Festimi i 14 Korrikut është gjithmonë një moment i paharruar dhe simbolik në jetën e kombit francez. Kjo datë është pjesë e historisë kolektive të Francës, sepse më 14 korrik 1789, populli francez liroi të burgosurit e arrestuar në mënyrë arbitrare në Kështjellën e Bastijes. Është kjo dita që historia e mban mend si simbol i një France dhe një populli që duke thyer zgjedhën e monarkisë u bë zot i fatit të tij politik.

Parimet që burojnë nga Revolucioni Francez u përfshinë gjerësisht në Deklaratën universale të vitit 1948, dhe përbëjnë edhe sot themelin më të fortë mbi të cilin u ndërtuan demokracitë tona dhe mbi të cilat u ndërtua Bashkimi Evropian.