Misioni i BE-së i jep notë pozitive procesit zgjedhor, pos për serbët

08 October 2019 19:17

Kanë mbetur të kënaqur me atë që kanë parë deri të dielën në pjesën më të madhe të vendit, me përjashtim të zonave të banuara me shumicë serbe.

Vëzhguesit e zgjedhjeve të parakohshme që erdhën nga shtetet e BE-së, konsiderojnë se frikësimi dhe kërcënimet që serbët të votojnë për Listën Serbe, e ka cenuar procesin, raporton KTV.

“Komunat e kontrolluara nga Lista Serbe , si dhe Qeveria e Serbisë, i drejtuan serbët e Kosovës të votojnë vetëm për Listën Serbe, ndërsa kundërshtarët e tyre u denoncuan si anti-serbë. Kjo e kufizoi ushtrimin e së drejtës themelore demokratike për lirinë e shprehjes, tubimit dhe përfaqësimit, dhe për rrjedhojë, procesi zgjedhor për serbët e Kosovës nuk i përmbushi këto standarde demokratike”, ka thënë Viola von Cramon-Taubadel, kryesuese e misionit.

Në përmbledhje të gjetjeve, u theksua se disa kanale televizive kishin shkelur rregulloren për përmbajtjen me pagesë, çka konstatuan se KPM-ja, nuk ia kishte dalë të përmbushë obligimin e saj.

Po ashtu, edhe ueb-faqja e transmetuesit publik, RTK, sipas raportit, shpesh kishte bërë mbulim të njëanshëm në favor të PDK-së.

Financimi i fushatave të partive, mbetet një prej çështjeve problematike, për të cilën, i dërguari nga Parlamenti Evropian, Andrey Kovatchef, tha se shpreson të rregullohet nga qeveria e ardhshme.

“Korniza rregulluese aktuale nuk garanton transparencën dhe integritetin e financave partiake të fushatës. Përveç kësaj, shumë parti politike, e kanë interpretuar ligjin që të nënkuptojë se nga ta kërkohet të raportojnë vetëm për shpenzimet gjatë 10 ditëve të fundit të fushatës. Kjo në masë të ndjeshme e redukton, e ul transparencën. Përveç kësaj, ka pasur edhe pretendime që partitë në pushtet në të kaluarën, kanë ndarë kontrata të prokurimit publik, donatorëve të mëdhenj”, ka thënë Andrey Kovatchef, shef i delegacionit të PE-së.

Kovatchevi u ndal në faktin që edhe këto zgjedhje ishin të parakohshme, çka sipas tij, është tregues i mungesës së stabilitetit, me pritjet që qeveria e ardhshme ta çojë në fund mandatin, për të pasur mundësi të finalizojë reformat që lidhen me integrimin në BE.

zgjedhjet e parakohshme, në Kosovë erdhën 108 vëzhgues nga BE-ja, Norvegjia e Zvicra, që do të përcjellin procesin deri në certifikimin e rezultateve, për të dalë me raportin përfundimtar.

© KOHA. Të gjitha të drejtat janë të rezervuara.

Të ngjashme