Kosova ia ndalon Zvezdës hyrjen për ndeshje ilegale në veri

09 October 2019 19:31

Ballafaqimi i Kupës së Serbisë ndërmjet Trepçës së Zveçanit e Cërvena Zvezdës, nuk është lejuar të zhvillohet në Kosovë.

Ekipi serb u ndal në pikën kufitare në Jarinje nga Policia e Kosovës dhe forcat speciale ROSU, të cilët nuk kanë lejuar që autobusi me futbollistët e Cërvena Zvezdës dhe tifozët e këtij ekipi, të hyjnë në territorin e vendit tonë, raporton KTV.

Takimi me Trepçën e Zveçanit ishte i rëndësishëm për 1/16-ën e Kupës së Serbisë dhe ishte paraparë të zhvillohej të mërkurën në ora 14:00 në Zhitkovc.

Policia ka thënë se është refuzuar kërkesa e Trepçës në bazë të urdhëresës së drejtorisë së Policisë në Prishtinë, dhe autobusi i nisur nga Beogradi është ndalur në Jarinje para orës 11:30.

Kryetari i Federatës së Futbollit e Kosovës, Agim Ademi, më parë u ka dërguar letër UEFA-s e FIFA-s që një gjë e tillë të mos ndodhë, pasi nuk ndodh askund në botë që një shtet, garat zyrtare t’i luajë në një shtet tjetër.

E hyrjen e klubit serb në Kosovë, kategorikisht e ka kundërshtuar edhe Sekretari i Përgjithshëm i FFK-së, Eroll Salihu, që i kontaktuar nga Sporti në KTV në mëngjes, ka thënë shkurt se Cërvena Zvezda nuk hynë në Kosovë dhe nuk ka kthim prapa.

FIFA, javën e kaluar, i dërgoi letër FFK-së që ta lejojë Cërvena Zvezdën të luajë në vendin tonë, por kërkesa në organet e sigurisë së Kosovës nuk u hoq, dhe vendimi mbeti në fuqi.

Mediat serbe shkruajnë se ky takim do të zhvillohet të enjten në Serbi, ndërsa drejtori i Zyrës për Kosovën në Qeverinë e Serbisë, Marko Gjuriq, ka kërkuar përjashtimin e Kosovës nga UEFA e FIFA.

Cërvena Zvezda më parë ka zhvilluar ndeshje të karakterit humanitar në Kosovë kundër ekipit të komunës së Graçanicës, edhe pse nuk kanë munguar thirrjet nacionaliste të serbëve.

© KOHA. Të gjitha të drejtat janë të rezervuara.

Të ngjashme