Video

Për çka janë marrë vesh e për çka ende jo LDK-ja dhe LVV-ja

1

Dy partitë që dolën të parat në zgjedhjet e fundit, po synojnë që asnjë temë në 4 vitet e ardhshme të mos i zërë në befasi, përfshirë këtu edhe fundin e mandatit të presidentit Hashim Thaçi dhe kandidatin që do ta pasojë atë.

Përderisa në kuadër të 6 takimeve të grupeve punuese të Vetëvendosjes e LDK-së, çështja e presidentit nuk ka qenë temë, kjo çështje do të diskutohet në nivel më të lartë dhe këtë e ka pohuar edhe vetë kryetari i LDK-së, Isa Mustafa.

Por, sipas Mustafës, nuk do të diskutohet për emrin e kandidatit, raporton KTV.

Në fuqi, i pari i LDK-së tha se mbetet zotimi që partisë së parë me vota t’i takojë edhe kryeministri, derisa i pyetur për dialogun, Mustafa tha se do t’i mbetet qeverisë si temë, por u shpreh pro idesë së reciprocitetit.

Në mbledhjen e kryesisë së LDK-së, Mustafa tha të jenë informuar mbi rrjedhën e dialogut me Vetëvendosjen dhe tha të kenë arritur pajtim në shumë fusha, por edhe në mënyrën se si do të funksionojë qeveria.

Çështjet për të cilat nuk ka pajtim, sipas Mustafës, janë ekonomike, derisa ka përmendur edhe fondin e privatizimit si një prej tyre.