Shëndetësia ka zënë hapësirë të rëndësishme në premtimet e kryetarëve të komunave. Për këtë mandat, ata kanë dyfishuar numrin e premtimeve në këtë sektor.
Nga gjithsej 1 mijë e 819 premtime sa janë dhënë para qytetarëve gjatë fushatës për zgjedhje lokale, 134 prej tyre janë dhënë për shëndetësinë. Ndërkohë, në mandatin e kaluar ishin vetëm 51 sosh.
Instituti GAP i ka numëruar premtimet e 27 kryetarëve të komunave për mandatin e ardhshëm katër vjeçar. Bekim Salihu, teksa prezantoi këto të dhëna, tregoi se fusha e urbanizimit edhe këtë mandat ka më së paku premtime.
“Nga 27 kryetarë komunash, GAP për mandatin 2021-2025 ka evidentuar 1819 premtime të dhëna para qytetarëve. Numri më i madh i premtimeve të dhëna i takon fushës së shërbimeve publike me 380 premtime, pastaj arsimi me 275 premtime dhe në këtë mandat fusha e kulturës ka më shumë premtime sesa fusha e infrastrukturës. Në fushën e kulturës 201 premtime, 198 premtime në infrastrrukturë. Në ekonomi, 175 premtime konkrete”, tha Salihu.
Me numrin më të madh të premtimeve për mandatin e qeverisës 2021-2025 prin kryetari i Prishtinës, Përparim Rama, me 206 gjithsej.
Ai pasohet nga kryetari i Mitrovicës, Bedri Hamza me 123 premtime, i Gjilanit me 109 premtime dhe Shtimjes me 107.
Ndërkohë, sipas Institutit GAP, numri më i vogël i premtimeve është dhënë nga kryetari i Vitisë, gjithsej 19, i cili në mandatin e kaluar kishte numrin më të madh të tyre, 100 sosh. Pas tij vjen ai i Deçanit me 20 premtime dhe i Pejës me 25 premtime.
Salihu potencoi se nga 165 kandidatë që e kanë synuar pozitën e kryetarit të komunës, vetëm 11 prej tyre kanë qenë gra.
© KOHA. Të gjitha të drejtat janë të rezervuara.
