Zëvendëskryeministri i parë i Kosovës, Besnik Bislimi, ka pasur të mërkurën në Bruksel takim me komisionerin e Zgjerimit dhe Fqinjësisë së Bashkimit Evropian, Oliver Varhelyi, me të cilin ka diskutuar për çështje që kanë të bëjnë me reformat evropiane në Kosovë, si dhe për çështjet e energjisë.
"Me Varhelyin kemi pasur një sërë temash për diskutim, kryesisht që kanë të bëjnë me fushat që janë me rëndësi në procesin e integrimit në BE, janë edhe sfidat në fushën e energjisë. Tash ne po presim miratimin e strategjisë së energjisë elektrike për tetë vjetët e ardhshëm dhe në këtë kontekst është me rëndësi të shihet se në ç'masë Bashkimi Evropian mund të na mbështesë në transicionin drejt energjisë së gjelbër", ka thënë zëvendëskryeministri Bislimi pas këtij takimi në Bruksel.
Ai ka treguar se në takim me komisionerin Varhelyi është trajtuar edhe çështja e reformave në administratën publike.
"Folëm për reformat në administratën publike, për sfidat të cilat jemi duke i pasur, si dhe për mundësitë që të marrim mbështetje teknike nga Bashkimi Evropian për reformën në drejtësi, gjegjësisht ligjin për vetingun, si dhe për Këshillin Prokurorial të Kosovës, ku po ashtu kemi mbështetje nga BE-ja, por edhe opinione nga Komisioni i Venedikut, si dhe për projektet që duhet të përfshihen në IPA3, në kuadër të planeve për investime të Bashkimit Evropian", ka shtuar ai.
Bislimi me këtë rast u është përgjigjur edhe kritikave që ndaj tij ka drejtuar Petar Petkoviq, shef i delegacionit të Serbisë në dialog, i cili atë e kishte kritikuar si "fajtor për moszhvillimin e takimit trepalësh në Bruksel gjatë dialogut, të martën.
"Konsultat nuk kanë pasur për qëllim sigurimin e takimit trepalësh. Konsultat kanë pasur për qëllim finalizimin e marrëveshjes për energjinë apo udhërrëfyesin për zgjidhjen e çështjes së energjisë në veri. Gjithçka dukej shumë mirë deri në momentin e fundit, por si duket palës në Bruksel i duhet edhe pak kohë për finalizim", ka thënë Bislimi.
Zëvendëskryeministri i parë i Kosovës ka shtuar se në takimin trepalësh është dashur të diskutohej për përgatitjen e takimit në nivel të lartë, presidentit të Serbisë, Aleksandar Vuçiq dhe kryeministrit të Kosovës, Albin Kurti.
"Unë kam insistuar që të mbahet ky takim, por si duket nuk ka pasur interesim nga pala serbe, e cila pastaj është kompensuar me një deklaratë të pavërtetë në media, ku thuhet se Bislimi ka rezistuar. Mendoj se një gjë e tillë duhet të demantohet edhe nga vetë Zyra e Lajçakut, pasi që tërë deklarata e Petkoviqit është e pavërtetë", ka sqaruar Bislimi.
Zëvendëskryeministri Bislmi ka thënë se ky deklarim i Petkoviqit madje është në funksion të rritjes së besimit në të.
"Ai (Petkoviqi) ka probleme serioze me besimin që ka nga vetë Qeveria e Serbisë. Si duket i ka ditët apo javët e numëruara në procesin e dialogut, i përdor këto deklarata për rikuperim personal. Kështu që nuk duhet t'i jepni kurrfarë serioziteti, mendoj që ka një rënie të dukshme të seriozitetit të participimit të tij në procesin e dialogut", ka deklaruar më tutje ai.
Ndërkaq Miroslav Lajçak, ndërmjetësi në dialog, ka thënë sot se janë shumë afër për të arritur sukses dhe përparim në disa dokumente.
“Pas 11 orësh bisedimesh të vështira dje, jemi afër të arrijmë marrëveshje për disa dokumente. Por, siç ndodh shpesh, hapi i fundit është më i vështiri. Puna vazhdon”, ka shkruar Lajçaku në Twitter.
Petkoviqi të martën, pas takimit me Lajçakun, ka treguar edhe se çështja e parë të cilën e kishte ngritur pala serbe ishte ajo e Asociacionit.
“Kemi përfunduar një raund tjetër të bisedimeve, kemi kaluar mbi dhjetë orë në ndërtesën e BE-së. Pyetjen e parë që e kemi bërë ka qenë formimi i Asociacionit. Kanë kaluar nëntë vjet nga Marrëveshja e Brukselit dhe ende jemi në pritje të formimit. Pa Asociacion nuk e di se si mund të ecim tutje e të flasim për çështje tjera. Jemi të gatshëm të bisedojmë. Por me rëndësi është që të zbatohen gjitha marrëveshjet”, i kishte thënë të martën Petkoviqi agjencisë serbe të lajmeve, "Tanjug".
Ai kishte dhënë edhe hollësi të tjera të takimit.
“Kemi diskutuar edhe për energjetikën e ende presim licencat për dy kompani serbe, pasi është e rëndësishme në këtë krizë energjetike. Po ashtu kemi folur për drejtësinë, për sulmet ndaj popullatës serbe. Kemi biseduar me Lajçakun, pasi Bislimi ka refuzuar të flasë me palën serbe”, kishte thënë ai.
Zyra për Media e Kryeministrit ka njoftuar se në takimet mes Bislimit e Lajçakut u diskutua për personat e zhdukur me forcë gjatë luftës në Kosovë, po ashtu për energjinë, ndërsa edhe për targa.
“Në këto takime u diskutua për çështjen e personave të zhdukur me forcë gjatë luftës në Kosovë, për ndjeshmërinë dhe urgjencën e një zgjidhjeje sa më të shpejtë. U fol për energjinë në kuadër të marrëveshjes ekzistuese. Diskutimet me Bashkimin Evropian në këtë fushë kanë shënuar progres, megjithatë mbeten ende detaje për t’u trajtuar. Çështje tjetër e diskutimit ishte edhe ajo e targave të veturave. Grupet teknike kanë filluar të finalizojnë propozimet e tyre përfundimtare. Takimet e grupeve teknike do të vazhdojnë deri në përzgjedhjen përfundimtare të opsioneve sipas standardeve dhe praktikave të Bashkimit Evropian”, njoftohet nga Zyra e Kryeministrit.
© KOHA. Të gjitha të drejtat janë të rezervuara.
